ఆంధ్రప్రదేశ్ రాజకీయం మరోసారి ఊహించని మలుపులు తీసుకుంటోంది. జగన్ సొంతగడ్డ కడపలో తాజా రాజకీయ పరిణామాలు మరోసారి రాజకీయ విశ్లేషకుల దృష్టిని ఆకర్షించాయి. ఇప్పటివరకు కడప అంటే వైఎస్ కుటుంబానికి ఓ గౌరవ గుర్తింపు. అయితే, గడిచిన ఎన్నికల్లో కడపలో కూటమి డామినేషన్ చూపించగా.. ఇప్పుడు జిల్లా పరిషత్ చైర్మన్ పదవిని కూడా చేజిక్కించుకునే ప్రయత్నాల్లో టీడీపీ కీలక దశకు చేరుకుంది.
వైసీపీ అధికారంలో ఉన్న సమయంలో జరిగిన స్థానిక సంస్థల ఎన్నికల్లో కడపలో 50 జడ్పీటీసీ సీట్లలో 49 పై వైసీపీ విజయం సాధించింది. కానీ పరిస్థితులు ఇప్పుడు పూర్తి భిన్నంగా మారాయి. ఎన్నికల ఫలితాల అనంతరం వైసీపీకి చెందిన నలుగురు జడ్పీటీసీలు టీడీపీలో చేరారు. దీంతో టీడీపీ బలం ఐదు కాగా… వైసీపీ 45కు పడిపోయింది. ఇక తాజా పరిణామాల్లో ఎమ్మెల్యేగా గెలిచిన ఆకేపాటి అమర్నాథ్ రెడ్డి జడ్పీ చైర్మన్ పదవికి రాజీనామా చేయడం టీడీపీకి అచ్చొందిన అవకాశంగా మారింది.
ఇప్పటికే కూటమికి అనుకూలంగా ఉన్న ఎక్స్ అఫీషియో సభ్యుల సంఖ్య పెరగడం, ఎమ్మెల్యేల మద్దతు టీడీపీకి దక్కడం వంటి అంశాలు జడ్పీ చైర్మన్ ఎన్నికపై ప్రభావం చూపించనున్నాయి. ఈ నేపథ్యంలో వైసీపీ జడ్పీటీసీలను ప్రలోభాలకు గురి చేయకుండా నియంత్రించాలన్న దిశగా పార్టీ కీలక నేత అవినాశ్ రెడ్డి బృహత్తర వ్యూహాన్ని అమలు చేశారనే ప్రచారం జోరుగా సాగుతోంది. అదే కారణంగా జడ్పీటీసీలను బెంగళూరు క్యాంప్కు తరలించారన్న వార్తలు ఊపందుకున్నాయి.
ఇదే సమయంలో టీడీపీ మాత్రం మరోపక్క చురుగ్గా పావులు కదుపుతోంది. తమ వైపు మొగ్గు చూపుతున్న జడ్పీటీసీలతో ఇప్పటికే సంప్రదింపులు పూర్తయ్యాయని, ఎలక్షన్ సమయానికి సరిపడే సంఖ్యలో మద్దతుదారులను కలుపుకుని చైర్మన్ పదవిని దక్కించుకుంటామనే ధీమాతో ఉంది. ఈ లెక్కన చూస్తే జగన్ మోహన్ రెడ్డి తన కుటుంబ గడ్డపై చైర్మన్ స్థాయిలో పార్టీని నిలబెట్టుకోవడానికి గట్టి పోరాటం చేయాల్సిన పరిస్థితి ఏర్పడింది. టీడీపీ పావులు కదుపుతున్న వేగాన్ని చూస్తే, కడపలో పార్టీ గుర్తును నిలబెట్టుకోవడం వైసీపీకి సవాలుగా మారిందన్నమాట.
కడపలో క్యాష్ ఆఫర్స్ కళ్ళు చెదిరిపోతున్నాయా? తమకు అంత డిమాండ్ వస్తుందని ఆ జడ్పీటీసీలు కూడా ఊహించలేకపోయారా? చివరికి సొంత పార్టీ సభ్యులకే వైసీపీ సొమ్ములు ముట్టజెప్పుకోవాల్సి వస్తోందా? క్యాంప్ పాలిటిక్స్, క్యాష్ ఆఫర్స్తో కడప రాజకీయం రక్తి కడుతోందా? ఒక్కో జడ్పీటీసీ ఎంత రేటు పలుకుతున్నారు? ఉమ్మడి కడప జిల్లా పరిషత్ చైర్మన్ ఎన్నిక ఈనెల 27న జగరనుంది. ఖాళీ అయిన ఈ పోస్ట్ కోసం ఇటు వైసీపీ, అటు టీడీపీ ఎత్తులకు పై ఎత్తులు వేస్తుండటం ఆసక్తికరంగా మారింది. జడ్పీలో తెలుగుదేశం పార్టీకి బలం లేకపోయినా వైసీపీ నుంచి వలస వచ్చిన సభ్యుల సాయంతో పీఠాన్ని కైవసం చేసుకోవాలని అనుకుంటోందట. జగన్ అడ్డాలో తమ వాళ్ళని కాపాడుకునేందుకు వైసీపీ కూడా గట్టి ప్రయత్నాలు చేయడంతో క్యాంప్ పాలిటిక్స్కు తెర లేచింది. తమ సభ్యులందర్నీ వైసీపీ ప్రత్యేక బస్సుల్లో హైదరాబాద్ తరలించినట్టు తెలిసింది. అటు వైసీపీలో అసంతృప్తిగా ఉన్న జడ్పిటిసిలకు టీడీపీ భారీగా నగదు గాలం వేస్తున్నట్టు చెప్పుకుంటున్నారు. ఒక్కో సభ్యుడికి 25 లక్షల రూపాయల ఆఫర్ ఇచ్చినట్టు ప్రచారం జరుగుతోంది.నియోజకవర్గ స్థాయి లీడర్లకు సైతం జడ్పీటీసీలతో వస్తే కూటమిలో తగిన ప్రాధాన్యత ఇస్తామని ఆఫర్ చేస్తున్నారట. ఆ క్రమంలోనే బద్వేల్ నియోజకవర్గంలో ఓ నేతకు రెండు కోట్ల ఆఫర్ ఇచ్చినట్టు సమాచారం. బద్వేల్ వైసీపీ ఇన్చార్జి పై అసంతృప్తిగా ఉన్న ఆ నేత ఎన్డీఏ కూటమి వైపు చూస్తున్నారట. కనీసం ముగ్గురి కోసం ఆయన బేరమాడుకున్నట్టు చెప్పుకుంటున్నారు. ఇప్పటికే వైసీపీని వీడి ఆరుగురు జడ్పిటిసిలు కూటమిలో చేరారు. ఉమ్మడి కడప జిల్లా పరిషత్ చైర్మన్ గా ఉన్న ఆకే పాటి అమర్నాథ్ రెడ్డి రాజంపేట ఎమ్మెల్యేగా గెలవడంతో సీటు ఖాళీ అయింది. చైర్మన్ పదవితో పాటు ఒంటిమిట్ట జడ్పిటిసి పదవికి ఆయన రాజీనామా చేశారు. పులివెందుల జడ్పిటిసి రోడ్డు ప్రమాదంలో చనిపోవడంతో రెండు సీట్లు కూడా ఖాళీ అయ్యాయి. ఉమ్మడి కడపలో మొత్తం 50 జెడ్పిటిసి స్థానాలు ఉండగా 49 వైసీపీ,ఒక్కటి టీడీపీకి దక్కాయి.
