Revanth Reddy తెలంగాణను దేశంలోనే అత్యంత వేగంగా అభివృద్ధి చెందుతున్న రాష్ట్రంగా తీర్చిదిద్దడమే తమ ప్రభుత్వ ప్రధాన లక్ష్యమని ముఖ్యమంత్రి రేవంత్ రెడ్డి స్పష్టం చేశారు. మహబూబ్నగర్ జిల్లాలో అమర రాజా సంస్థ కార్యక్రమం, అలాగే ఫ్యూచర్ సిటీలో అమెజాన్ డేటా సెంటర్ శంకుస్థాపన కార్యక్రమాల్లో పాల్గొన్న ఆయన, తెలంగాణ రైజింగ్–2047 విజన్, పరిశ్రమల అభివృద్ధి, ఉపాధి కల్పన, మౌలిక వసతులు, పర్యావరణ పరిరక్షణ, రైతుల సంక్షేమం వంటి పలు కీలక అంశాలపై సుదీర్ఘంగా మాట్లాడారు. రాష్ట్ర అభివృద్ధి కోసం గత ప్రభుత్వాలు తీసుకొచ్చిన మంచి విధానాలను కూడా కొనసాగిస్తూ, కొత్త పారిశ్రామిక విధానాలతో తెలంగాణను ప్రపంచ పెట్టుబడుల కేంద్రంగా తీర్చిదిద్దుతామని పేర్కొన్నారు.
“ఢిల్లీకి రాజు అయినా… తల్లికి బిడ్డ అన్నట్లుగా నేను పాలమూరు బిడ్డనే” అని సీఎం రేవంత్ రెడ్డి పేర్కొంటూ మహబూబ్నగర్తో తన అనుబంధాన్ని గుర్తు చేశారు. ఒకప్పుడు కరువు, వలసల జిల్లాగా పేరొందిన పాలమూరును నేడు అభివృద్ధికి ఆదర్శంగా నిలబెట్టేందుకు ప్రభుత్వం కృషి చేస్తోందన్నారు. విద్య, వైద్యం, సాగునీరు, పరిశ్రమలు, ఉపాధి వంటి అన్ని రంగాల్లో సమగ్ర అభివృద్ధి సాధించేందుకు ప్రత్యేక ప్రణాళికలు అమలు చేస్తున్నామని తెలిపారు.
అమర రాజా సంస్థపై ప్రశంసలు కురిపించిన సీఎం, 1983లో చిత్తూరు జిల్లాలో ప్రారంభమైన ఈ సంస్థ నేడు ప్రపంచ స్థాయి సంస్థగా ఎదగడం గర్వకారణమన్నారు. చైనా, జపాన్, జర్మనీ, దక్షిణ కొరియా వంటి పారిశ్రామిక దేశాలతో పోటీ పడుతూ ఎలక్ట్రిక్ వాహనాల బ్యాటరీల తయారీలో అమర రాజా కీలక పాత్ర పోషిస్తోందని చెప్పారు. “అమర రాజా ఒక గ్లోకల్ సంస్థ. స్థానికంగా పుట్టి ప్రపంచవ్యాప్తంగా తన ముద్ర వేసిన కంపెనీ” అని కొనియాడారు.
దివిటిపల్లి అమర రాజా యూనిట్లో వందలాది మంది స్థానిక యువతకు ఉపాధి లభిస్తోందని సీఎం తెలిపారు. ముఖ్యంగా 700 మంది ఉద్యోగుల్లో 400 మందికి పైగా మహిళలు ఉండటం మహిళా సాధికారతకు నిదర్శనమని పేర్కొన్నారు. గ్రామీణ మహిళలకు ఉపాధి కల్పించడం ద్వారా కుటుంబాల ఆర్థిక పరిస్థితి మెరుగుపడుతోందని అన్నారు.
పర్యావరణ పరిరక్షణపై కూడా సీఎం ప్రత్యేకంగా దృష్టి సారించారు. వాతావరణ మార్పులు, ఎల్నినో ప్రభావం, వర్షాభావం, పెరుగుతున్న కాలుష్యం రైతులను తీవ్రంగా ప్రభావితం చేస్తున్నాయని పేర్కొన్నారు. కోవిడ్ అనంతరం ప్రపంచవ్యాప్తంగా వాతావరణ పరిస్థితుల్లో మార్పులు చోటుచేసుకున్నాయని, భవిష్యత్ తరాలను దృష్టిలో ఉంచుకుని కాలుష్యాన్ని తగ్గించాల్సిన అవసరం ఉందన్నారు. అందుకే ఎలక్ట్రిక్ వాహనాలను ప్రోత్సహిస్తూ రాష్ట్ర ప్రభుత్వం ప్రత్యేక విధానాలు అమలు చేస్తోందని చెప్పారు.
హైదరాబాద్ను దేశంలోనే అత్యంత పర్యావరణహిత నగరంగా తీర్చిదిద్దేందుకు ప్రభుత్వం చర్యలు చేపట్టిందన్నారు. ఎలక్ట్రిక్ వాహనాల రిజిస్ట్రేషన్పై పన్ను పూర్తిగా మినహాయించడం ద్వారా ఏడాదికి రూ.1,500 కోట్ల ఆదాయాన్ని ప్రభుత్వం వదులుకుంటోందని, అయినప్పటికీ ప్రజల ఆరోగ్యం, కాలుష్య నియంత్రణ కోసం ఈ నిర్ణయం తీసుకున్నామని తెలిపారు. డీజిల్ ఆటోలను దశలవారీగా ఎలక్ట్రిక్ వాహనాలుగా మార్చే ప్రణాళికలు కూడా అమల్లో ఉన్నాయని వెల్లడించారు.
తెలంగాణ రైజింగ్–2047 విజన్పై మాట్లాడిన సీఎం, ప్రస్తుతం దేశ జీడీపీలో తెలంగాణ వాటా 5 శాతం మాత్రమేనని, దానిని 10 శాతానికి పెంచడమే ప్రభుత్వ లక్ష్యమని స్పష్టం చేశారు. 2034 నాటికి తెలంగాణను ఒక ట్రిలియన్ డాలర్ల ఆర్థిక వ్యవస్థగా, 2047 నాటికి మూడు ట్రిలియన్ డాలర్ల ఆర్థిక శక్తిగా తీర్చిదిద్దేందుకు ప్రభుత్వం దీర్ఘకాలిక ప్రణాళికతో ముందుకు సాగుతోందన్నారు. పరిశ్రమలు, ఐటీ, పర్యాటకం, ఆరోగ్యం, గ్రీన్ ఎనర్జీ, డేటా సెంటర్లు వంటి రంగాల్లో భారీ పెట్టుబడులు ఆకర్షించేందుకు ప్రత్యేక విధానాలు రూపొందించామని చెప్పారు.
ఫ్యూచర్ సిటీలో అమెజాన్ డేటా సెంటర్ నిర్మాణం తెలంగాణకు మరో మైలురాయిగా నిలుస్తుందని సీఎం పేర్కొన్నారు. ఈ ప్రాజెక్టు ద్వారా ప్రపంచంలోని ప్రముఖ టెక్నాలజీ సంస్థలకు తెలంగాణపై మరింత విశ్వాసం పెరుగుతుందని, భవిష్యత్తులో మరిన్ని ఫార్చ్యూన్-500 కంపెనీలు రాష్ట్రంలో పెట్టుబడులు పెట్టే అవకాశం ఉందన్నారు. 2025లో నిర్వహించిన తెలంగాణ రైజింగ్ గ్లోబల్ సమ్మిట్కు 108 దేశాల నుంచి వేలాది మంది ప్రతినిధులు హాజరుకావడం రాష్ట్ర పెట్టుబడి సామర్థ్యానికి నిదర్శనమని చెప్పారు.
2034 నాటికి అమెజాన్ సంస్థ తెలంగాణలో లక్ష కోట్ల రూపాయలకు పైగా పెట్టుబడులు పెట్టాలని ప్రభుత్వం కోరుతోందని సీఎం వెల్లడించారు. ప్రతి నెలా పరిశ్రమల పురోగతిపై సమీక్ష నిర్వహిస్తూ పెట్టుబడిదారులకు ఎదురయ్యే సమస్యలను వెంటనే పరిష్కరిస్తామని హామీ ఇచ్చారు.
రాష్ట్రాన్ని క్యూర్ (Healthcare), ప్యూర్ (Green & Sustainable), రేర్ (Advanced Manufacturing & Innovation) ప్రాంతాలుగా విభజించి అభివృద్ధి చేస్తున్నామని రేవంత్ రెడ్డి తెలిపారు. ప్రతి ప్రాంతానికి ప్రత్యేక అభివృద్ధి వ్యూహం అమలు చేస్తూ పెట్టుబడులు, ఉపాధి అవకాశాలు, మౌలిక వసతులు సమానంగా అందించే దిశగా ప్రభుత్వం పనిచేస్తోందన్నారు.
మహబూబ్నగర్ జిల్లాలో విద్యా రంగానికి పెద్దపీట వేస్తున్నామని పేర్కొన్న సీఎం, ట్రిపుల్ ఐటీలు, ఇంజినీరింగ్ కళాశాలలు, యంగ్ ఇండియా ఇంటిగ్రేటెడ్ స్కూల్స్, అడ్వాన్స్డ్ ట్రైనింగ్ సెంటర్లు, పాలిటెక్నిక్ కళాశాలలను ఏర్పాటు చేస్తున్నామని తెలిపారు. పరిశ్రమలకు అవసరమైన నైపుణ్యంతో యువతను తీర్చిదిద్దేందుకు యంగ్ ఇండియా స్కిల్ యూనివర్సిటీ కీలక పాత్ర పోషిస్తుందని చెప్పారు.
సాగునీటి ప్రాజెక్టుల విషయానికొస్తే కల్వకుర్తి, భీమా, నెట్టంపాడు, ఆర్డీఎస్ వంటి ప్రాజెక్టులను వేగంగా పూర్తి చేస్తున్నామని సీఎం తెలిపారు. పాలమూరు-రంగారెడ్డి ఎత్తిపోతల పథకానికి 90 టీఎంసీల నీటి కేటాయింపుపై పొరుగు రాష్ట్రంతో చర్చలు కొనసాగుతున్నాయని, డిండి ప్రాజెక్టుకు అదనంగా 30 టీఎంసీల నీటి కేటాయింపుపైనా ప్రయత్నాలు చేస్తున్నామని వెల్లడించారు. త్వరలో మహబూబ్నగర్ ప్రజలకు శుభవార్త అందిస్తామని హామీ ఇచ్చారు.
రైతుల త్యాగాలను ప్రభుత్వం ఎప్పటికీ మరిచిపోదని సీఎం స్పష్టం చేశారు. ఫ్యూచర్ సిటీ, రీజినల్ రింగ్ రోడ్డు, రేడియల్ రోడ్ల నిర్మాణానికి భూములు ఇచ్చిన రైతులను గౌరవించడం ప్రభుత్వ బాధ్యత అని పేర్కొన్నారు. భూములు కోల్పోయిన కుటుంబాలకు సరైన నష్టపరిహారం, ఉపాధి అవకాశాలు కల్పించాలని అధికారులను ఆదేశించారు. ఆందోళనలు చేస్తున్న రైతులతో చర్చించి సమస్యలకు పరిష్కారం చూపాలని సంబంధిత మంత్రులకు సూచించారు.
పెట్టుబడులు వస్తే ఉద్యోగాలు వస్తాయని, ఉద్యోగాలు వస్తే కుటుంబాల ఆదాయం పెరుగుతుందని, అదే రాష్ట్ర ఆర్థికాభివృద్ధికి బలమైన పునాదిగా మారుతుందని సీఎం అన్నారు. అమర రాజా, అమెజాన్ వంటి ప్రపంచస్థాయి సంస్థలు తెలంగాణలో మరిన్ని పెట్టుబడులు పెట్టాలని కోరుతూ, ప్రభుత్వం పూర్తిస్థాయిలో సహకారం అందిస్తుందని హామీ ఇచ్చారు.
తెలంగాణను పెట్టుబడులు, సాంకేతికత, పరిశ్రమలు, ఉపాధి, పర్యావరణ పరిరక్షణ, ఆధునిక మౌలిక వసతుల సమ్మేళనంగా తీర్చిదిద్దే దిశగా “తెలంగాణ రైజింగ్-2047” విజన్ను ప్రభుత్వం వేగంగా అమలు చేస్తోందని ముఖ్యమంత్రి రేవంత్ రెడ్డి స్పష్టం చేశారు. రాష్ట్ర అభివృద్ధిలో పరిశ్రమలు, రైతులు, యువత, మహిళలు, పెట్టుబడిదారులు భాగస్వాములు కావాలని ఆయన పిలుపునిచ్చారు.
Revanth Reddy
