తెలంగాణలో విమానయాన రంగ అభివృద్ధికి మరో కీలక ముందడుగు పడింది. ముఖ్యమంత్రి రేవంత్ రెడ్డి ఢిల్లీలో కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడుతో సమావేశమై వరంగల్ (మామునూరు), ఆదిలాబాద్ విమానాశ్రయాల నిర్మాణం, డిజైన్, మౌలిక వసతులు, భూసేకరణ, భవిష్యత్ అభివృద్ధి ప్రణాళికలపై సుదీర్ఘంగా చర్చించారు. తెలంగాణలో అంతర్జాతీయ ప్రమాణాలతో విమానాశ్రయాలను నిర్మించాలని, భవిష్యత్ అవసరాలకు అనుగుణంగా అన్ని ఆధునిక సదుపాయాలను కల్పించాలని సీఎం కేంద్ర మంత్రిని కోరారు.
వ్యూహాత్మకంగా, పారిశ్రామికంగా, వాణిజ్యపరంగా వరంగల్, ఆదిలాబాద్ ప్రాంతాలకు ఉన్న ప్రాధాన్యతను సీఎం వివరించారు. రాష్ట్ర అభివృద్ధికి ఈ రెండు విమానాశ్రయాలు కీలకంగా మారనున్నాయని, దేశీయ విమాన సర్వీసులతో పాటు భవిష్యత్తులో అంతర్జాతీయ విమాన సర్వీసులకు కూడా అనువుగా ప్రణాళికలు రూపొందించాలని సూచించారు. విమానాశ్రయాల నిర్మాణం కేవలం రవాణా సౌకర్యం మాత్రమే కాకుండా పెట్టుబడులు, పరిశ్రమలు, పర్యాటకం, ఉపాధి అవకాశాలకు కేంద్రంగా మారుతుందని ఆయన పేర్కొన్నారు.
వరంగల్కు ఉన్న చారిత్రక, సాంస్కృతిక వారసత్వాన్ని దృష్టిలో ఉంచుకుని విమానాశ్రయ టెర్మినల్ డిజైన్ కాకతీయ సంస్కృతికి అద్దం పట్టేలా ఉండాలని సీఎం కోరారు. కాకతీయుల శిల్పకళ, వారసత్వం, చారిత్రక వైభవాన్ని ప్రతిబింబించే విధంగా నిర్మాణ నమూనాలు రూపొందించాలని సూచించారు. దేశ విదేశాల నుంచి వచ్చే ప్రయాణికులు విమానాశ్రయంలో అడుగుపెట్టిన క్షణం నుంచే తెలంగాణ సంస్కృతి గొప్పదనాన్ని అనుభూతి చెందేలా రూపకల్పన చేయాలని అభిప్రాయపడ్డారు.
మామునూరు విమానాశ్రయంలో ప్రయాణికుల సేవలతో పాటు ఎంఆర్వో (మెయింటెనెన్స్, రిపేర్ అండ్ ఓవర్హాల్), ఎయిర్ కార్గో, హ్యాంగర్ సదుపాయాలు ఏర్పాటు చేయాలని సీఎం విజ్ఞప్తి చేశారు. దీంతో తెలంగాణ విమానయాన రంగానికి కొత్త అవకాశాలు ఏర్పడటంతో పాటు వేలాది మంది యువతకు ఉద్యోగ అవకాశాలు లభిస్తాయని తెలిపారు. అదేవిధంగా విమాన శిక్షణా సంస్థ (FTO) ఏర్పాటు చేస్తే రాష్ట్ర యువతకు పైలట్ శిక్షణ కోసం ఇతర రాష్ట్రాలకు వెళ్లాల్సిన అవసరం తగ్గుతుందని చెప్పారు.
వరంగల్ ఇప్పటికే రైలు, జాతీయ రహదారులతో దేశంలోని ప్రధాన నగరాలకు అనుసంధానమై ఉందని సీఎం గుర్తు చేశారు. కాకతీయ మెగా టెక్స్టైల్ పార్క్, కాజీపేట రైల్వే కోచ్ ఫ్యాక్టరీ, పారిశ్రామిక పార్కులు, విద్యాసంస్థలు, పర్యాటక ప్రాంతాలు ఉండటంతో ఈ ప్రాంతం వేగంగా అభివృద్ధి చెందుతోందన్నారు. ఉమ్మడి వరంగల్, కరీంనగర్, ఖమ్మం, నల్గొండ, ఆదిలాబాద్ జిల్లాలకు ఈ విమానాశ్రయం ప్రధాన కేంద్రంగా ఉపయోగపడుతుందని తెలిపారు.
మామునూరు విమానాశ్రయానికి అవసరమైన భూసేకరణ ఇప్పటికే పూర్తయిందని, వెంటనే టెండర్లు పిలిచి నిర్మాణ పనులు ప్రారంభించాలని సీఎం కోరారు. 2028 జూన్ 2 నాటికి విమానాశ్రయ నిర్మాణాన్ని పూర్తి చేసి ప్రజలకు అందుబాటులోకి తీసుకురావాలని లక్ష్యంగా పెట్టుకోవాలని కేంద్ర ప్రభుత్వాన్ని విజ్ఞప్తి చేశారు.
ఆదిలాబాద్ విమానాశ్రయాన్ని కూడా అత్యాధునిక సదుపాయాలతో అభివృద్ధి చేయాలని సీఎం ప్రతిపాదించారు. రక్షణ శాఖ ఆధ్వర్యంలో ఎయిర్ఫోర్స్ అవసరాలతో పాటు పౌర విమానయాన సేవలు అందించేలా విమానాశ్రయాన్ని నిర్మించాలని కోరారు. అవసరమైన భూమిని రాష్ట్ర ప్రభుత్వం సేకరించి అందజేస్తుందని హామీ ఇచ్చారు. ఆదిలాబాద్ విమానాశ్రయంలో కూడా ఎంఆర్వో, ఎయిర్ కార్గో, హ్యాంగర్, విమాన శిక్షణా కేంద్రాలను ఏర్పాటు చేయాలని సూచించారు.
మహారాష్ట్ర, ఛత్తీస్గఢ్ రాష్ట్రాలకు సమీపంలో ఉన్న ఆదిలాబాద్ భౌగోళికంగా ఎంతో ప్రాధాన్యత కలిగిన ప్రాంతమని సీఎం తెలిపారు. ఈ విమానాశ్రయం అభివృద్ధి చెందితే ఉత్తర తెలంగాణతో పాటు పొరుగు రాష్ట్రాల వ్యాపార కార్యకలాపాలకు కూడా కొత్త అవకాశాలు ఏర్పడతాయని చెప్పారు. వ్యవసాయ, అటవీ ఉత్పత్తుల ఎగుమతులకు ఎయిర్ కార్గో సేవలు ఎంతో ఉపయోగపడతాయని వివరించారు.
సమావేశంలో మరో వినూత్న ప్రతిపాదన కూడా చర్చకు వచ్చింది. హైదరాబాద్ హుస్సేన్ సాగర్ నుంచి విజయవాడ ప్రకాశం బ్యారేజీ వరకు సీ ప్లేన్ సేవలను ప్రారంభించే అవకాశాలను పరిశీలించాలని సీఎం రేవంత్ రెడ్డి కేంద్ర మంత్రిని కోరారు. దీనికి సంబంధించిన సమగ్ర ప్రతిపాదనలు పంపాలని కేంద్ర మంత్రి సూచించారు.
సమావేశం అనంతరం మీడియాతో మాట్లాడిన సీఎం రేవంత్ రెడ్డి అభివృద్ధికి రాజకీయాలకు సంబంధం ఉండకూడదని అన్నారు. ఎన్నికల సమయంలో మాత్రమే రాజకీయాలు ఉండాలని, రాష్ట్ర అభివృద్ధి కోసం కేంద్ర ప్రభుత్వంతో కలిసి పనిచేయడం ప్రతి రాష్ట్ర బాధ్యత అని చెప్పారు. ప్రజల ప్రయోజనాల కోసం కేంద్ర మంత్రులను కలవడం సహజమని, అభివృద్ధి అంశాలను కూడా రాజకీయ కోణంలో చూడటం సరికాదని వ్యాఖ్యానించారు.
కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు తెలంగాణ ప్రభుత్వాన్ని అభినందించారు. దేశంలో ఎక్కడా లేనంత వేగంగా విమానాశ్రయాల కోసం భూసేకరణ పూర్తి చేసి కేంద్రానికి అప్పగించిన రాష్ట్రంగా తెలంగాణ నిలిచిందని ప్రశంసించారు. ఇతర రాష్ట్రాలు కూడా తెలంగాణను ఆదర్శంగా తీసుకుని మౌలిక వసతుల అభివృద్ధిలో వేగంగా ముందుకు రావాలని సూచించారు.
విమానాశ్రయాల అభివృద్ధి ద్వారా పెట్టుబడులు పెరుగుతాయని, పరిశ్రమలు స్థాపించబడతాయని, పర్యాటక రంగం వేగంగా అభివృద్ధి చెందుతుందని కేంద్ర మంత్రి తెలిపారు. యువతకు ఉపాధి అవకాశాలు పెరగడంతో పాటు ప్రాంతీయ ఆర్థిక వ్యవస్థ బలోపేతం అవుతుందని పేర్కొన్నారు.
మామునూరు, ఆదిలాబాద్ విమానాశ్రయాలు పూర్తయితే తెలంగాణలో విమానయాన రంగానికి కొత్త దిశ లభించనుంది. ప్రయాణ సౌకర్యాలు మెరుగుపడటంతో పాటు ఎగుమతులు, పారిశ్రామికాభివృద్ధి, పెట్టుబడులు, పర్యాటకం, ఉపాధి అవకాశాలు గణనీయంగా పెరిగే అవకాశం ఉంది. తెలంగాణను దేశంలో ప్రముఖ పెట్టుబడి గమ్యస్థానంగా తీర్చిదిద్దే దిశగా ఈ రెండు విమానాశ్రయాలు కీలక పాత్ర పోషిస్తాయని అధికారులు, నిపుణులు అభిప్రాయపడుతున్నారు.
Telangana
