రాజకీయాలకు లక్ష్మణరేఖ.. మాట నిలబెట్టుకుంటారా?
వ్యక్తిగత దూషణలకు దూరంగా ఉండాలన్న నిర్ణయం హర్షణీయం.. ఇక అది మాటగా కాకుండా రాజకీయ సంస్కృతిగా మారాలి
ఆంధ్రప్రదేశ్ రాజకీయాల్లో మాటల మంటలు కాస్త తగ్గుతాయా? వ్యక్తిగత దూషణలకు తెరపడుతుందా? ప్రత్యర్థి కుటుంబాన్ని టార్గెట్‌ చేయకుండా విధానాలపై పోరాటం జరుగుతుందా? తాజాగా టీడీపీ, వైఎస్సార్‌సీపీ తమ శ్రేణులకు ఇచ్చిన సూచనలు ఈ ప్రశ్నలకు ఆశాజనకమైన సమాధానాన్ని ఇస్తున్నాయి.
వ్యక్తిగత జీవితాలపై వ్యాఖ్యలు చేయవద్దని రెండు ప్రధాన పార్టీలు తమ శ్రేణులకు చెప్పడం నిజంగా స్వాగతించదగిన పరిణామం. రాజకీయ ప్రత్యర్థిని ఓడించేందుకు అతని కుటుంబాన్ని, వ్యక్తిగత జీవితాన్ని ఆయుధంగా మార్చకూడదన్న సందేశం ప్రజాస్వామ్యానికి అవసరమైన కనీస సంస్కారం.
ఇది ఒక వ్యక్తి కోసం గీసిన లక్ష్మణరేఖగా కాకుండా.. రాజకీయాల మొత్తానికి గీసిన గీతగా మారాలి.
గతంలోనూ వ్యక్తిగత విమర్శలకు దూరంగా ఉండాలని చంద్రబాబు తన పార్టీ నేతలకు సూచించిన సందర్భాలున్నాయి. సమస్య ప్రకటనల కొరత కాదు. ప్రకటనలకు కట్టుబడి ఉండే రాజకీయ నైతికతే అసలు కొరత.
ఇప్పుడు మరోసారి అదే మాట వినిపిస్తోంది. వ్యక్తిగత విమర్శలు వద్దు. వ్యక్తిగత జీవితాల్లోకి వెళ్లొద్దు. సోషల్‌ మీడియాలో కూడా హద్దులు దాటొద్దు. మంచి నిర్ణయమే. కానీ ప్రజల ప్రశ్న ఒక్కటే. ఈ మాట ఎన్నికల వేడి తగ్గేంతవరకేనా? లేక భవిష్యత్ రాజకీయాలకు శాశ్వత నియమమా?
అధికారంలో ఉన్నప్పుడు ఒక నీతి, ప్రతిపక్షంలో ఉన్నప్పుడు మరో నీతి ఉంటే ఈ లక్ష్మణరేఖకు అర్థం ఉండదు. తమ నాయకుడి కుటుంబాన్ని ఎవరైనా విమర్శిస్తే ఆగ్రహించే పార్టీలు.. ప్రత్యర్థి కుటుంబంపై అదే భాషను ప్రయోగిస్తే అది రాజకీయమని సమర్థించుకోవడం ఇకనైనా ఆగాలి.
ప్రజాస్వామ్యంలో ప్రత్యర్థిని ఓడించడం తప్పు కాదు. అతని పాలనను ప్రశ్నించడం తప్పు కాదు. అతని విధానాలను తీవ్రంగా విమర్శించడం కూడా తప్పు కాదు. కానీ విధానాన్ని వదిలి వ్యక్తిని లక్ష్యంగా చేసుకోవడం మాత్రం రాజకీయ పతనానికి సంకేతం.
అవినీతి ఉంటే ఆధారాలతో ప్రశ్నించాలి. ప్రజా సమస్య ఉంటే పరిష్కారం కోరాలి. హామీ అమలు కాలేదంటే లెక్క అడగాలి. పాలన విఫలమైతే ప్రజల ముందు వివరించాలి. ఇవే రాజకీయ ఆయుధాలు కావాలి.
కుటుంబం కాదు.. విధానం. వ్యక్తిగత జీవితం కాదు.. ప్రజా జీవితం.
దూషణ కాదు.. విమర్శ.
విద్వేషం కాదు.. సిద్ధాంతపరమైన పోరాటం. ఇదే ఆరోగ్యకరమైన రాజకీయ సంస్కృతి.
ఈ బాధ్యత కేవలం చంద్రబాబు, జగన్‌లది మాత్రమే కాదు. పవన్‌కల్యాణ్‌ నుంచి ప్రతి రాష్ట్ర, జిల్లా, మండల, గ్రామస్థాయి నాయకుడి వరకు వర్తించాలి. సోషల్‌మీడియాలో కార్యకర్తలకు కూడా ఇదే నియమం ఉండాలి. నాయకులు ఒక మాట చెప్పి.. వారి అనుచరులు మరో మాట మాట్లాడితే ప్రజలు దానిని రాజకీయ నాటకంగానే చూస్తారు.
అందుకే ఇప్పుడు తీసుకున్న నిర్ణయాన్ని ప్రజలు స్వాగతిస్తారు. కానీ మాటపై నిలబడితేనే విశ్వసిస్తారు.
రాజకీయాల్లో శాశ్వత శత్రువులు ఉండరు. శాశ్వత మిత్రులు కూడా ఉండరు. కానీ ప్రజాస్వామ్య విలువలు మాత్రం శాశ్వతంగా ఉండాలి. ఎన్నికలు వస్తాయి.. పోతాయి. అధికారాలు మారుతాయి.. ప్రభుత్వాలు మారుతాయి. కానీ రాజకీయాల్లో సంస్కారం మిగలాలి. ఈరోజు గీసిన లక్ష్మణరేఖను రేపు ఎవరూ చెరపకుండా చూడాలి.
ప్రత్యర్థిని రాజకీయంగా ఓడించండి. కానీ వ్యక్తిగా అవమానించవద్దు. విధానాలను కూలదోయండి. కానీ కుటుంబాలను కించపరచవద్దు. ప్రజల కోసం పోరాడండి. వ్యక్తిగత ప్రతీకారాల కోసం కాదు.
ఇకనైనా ఆంధ్రప్రదేశ్ రాజకీయాలు ఎవరు ఎవరిని ఎంత దూషించారు? అనే స్థాయి నుంచి ఎవరు ప్రజల కోసం ఏమి చేశారు? అనే స్థాయికి ఎదగాలి.
మాట ఇచ్చారు. ఇప్పుడు ఆ మాటను నిలబెట్టుకోవాల్సిన బాధ్యత నాయకులదే. దాన్ని పాటించేలా చేయాల్సిన బాధ్యత పార్టీలదే. దాన్ని గమనించే బాధ్యత ప్రజలదే. మాటలు కాదు.. ఆచరణే అసలు పరీక్ష. ఆ పరీక్షలో ఎవరు నిలబడతారో.. ఎవరు మాట తప్పుతారో.. చివరికి ప్రజలే తీర్పు చెప్పాలి.
నరసింహారెడ్డి చందమూరి.
ఫ్రీలాన్స్ జర్నలిస్టు.కదిరి.
శ్రీ సత్యసాయి జిల్లా.
