తెలంగాణ రాష్ట్రాన్ని దేశంలోనే అత్యుత్తమ క్రీడా కేంద్రంగా తీర్చిదిద్దాలనే లక్ష్యంతో రాష్ట్ర ప్రభుత్వం కీలక అడుగులు వేస్తోంది. యువతలో క్రీడాస్ఫూర్తిని పెంపొందించడంతో పాటు అంతర్జాతీయ స్థాయి క్రీడాకారులను తయారు చేయాలనే ఉద్దేశంతో గచ్చిబౌలిలో ఏర్పాటు చేస్తున్న “గచ్చిబౌలి స్పోర్ట్స్ డిస్ట్రిక్ట్” కు ముఖ్యమంత్రి రేవంత్ రెడ్డి శ్రీకారం చుట్టారు. ఇదే కార్యక్రమంలో “యంగ్ ఇండియా ఫిజికల్ ఎడ్యుకేషన్ అండ్ స్పోర్ట్స్ యూనివర్సిటీ (YIPESU)” లోగో, అధికారిక వెబ్సైట్ను ఆవిష్కరించారు. అలాగే ఫిజికల్ లిటరసీ మిషన్, యంగ్ ఇండియా స్పోర్ట్స్ ఫెలోషిప్, అకడమిక్ కోర్సులను ప్రారంభిస్తూ తెలంగాణ క్రీడా రంగానికి నూతన దిశను నిర్దేశించారు.
ఈ సందర్భంగా మాట్లాడిన ముఖ్యమంత్రి రేవంత్ రెడ్డి, “లక్ష్యాన్ని చేరాలంటే వంద శాతం కష్టపడాల్సిందే” అని యువతకు పిలుపునిచ్చారు. కేవలం ప్రభుత్వ ఉద్యోగాల కోసమే కాకుండా క్రీడలను కూడా కెరీర్గా ఎంచుకోవాలని సూచించారు. ప్రపంచ దేశాలతో పోల్చితే ఒలింపిక్స్లో భారత్ ఇంకా ఆశించిన స్థాయిలో రాణించలేకపోవడానికి సరైన విధానాల లోపమే ప్రధాన కారణమని పేర్కొన్నారు.
దేశంలో అప్పుడప్పుడు పీటీ ఉష, అభినవ్ బింద్రా, నీరజ్ చోప్రా, పీవీ సింధు వంటి క్రీడాకారులు మాత్రమే ప్రపంచ స్థాయిలో భారత్కు పేరు తీసుకొచ్చారని గుర్తు చేశారు. కానీ ప్రతి ఒలింపిక్స్లో పతకాల పట్టికలో భారత్ అగ్రస్థానాల్లో నిలవాలంటే దీర్ఘకాలిక ప్రణాళికలు, ఆధునిక శిక్షణా వ్యవస్థలు, ప్రపంచ స్థాయి మౌలిక సదుపాయాలు అవసరమని అన్నారు.
అందుకే తెలంగాణ ప్రభుత్వం ప్రత్యేక స్పోర్ట్స్ పాలసీ రూపొందించి క్రీడాకారులకు అవసరమైన అన్ని రకాల ప్రోత్సాహకాలను అందిస్తోందని సీఎం వివరించారు. గ్రామీణ ప్రాంతాల నుంచి ప్రతిభావంతులైన యువతను గుర్తించి వారికి అంతర్జాతీయ ప్రమాణాల శిక్షణ అందించేలా ప్రత్యేక కార్యాచరణ రూపొందిస్తున్నట్లు తెలిపారు.
గచ్చిబౌలి స్పోర్ట్స్ డిస్ట్రిక్ట్ ద్వారా ఒకే ప్రాంగణంలో అత్యాధునిక స్టేడియాలు, ఇండోర్ ట్రైనింగ్ సెంటర్లు, స్పోర్ట్స్ సైన్స్ ల్యాబ్లు, ఫిజియోథెరపీ కేంద్రాలు, హై పెర్ఫార్మెన్స్ ట్రైనింగ్ యూనిట్లు, స్పోర్ట్స్ మెడిసిన్ సౌకర్యాలు అందుబాటులోకి రానున్నాయని వెల్లడించారు. ఇది కేవలం తెలంగాణకే కాకుండా దేశవ్యాప్తంగా క్రీడాకారులకు శిక్షణ కేంద్రంగా మారే అవకాశం ఉందన్నారు.
ఈ కార్యక్రమంలో నేషనల్ టాలెంట్ ఐడెంటిఫికేషన్ ప్రోగ్రామ్ పోస్టర్ను కూడా ముఖ్యమంత్రి ఆవిష్కరించారు. పారా అథ్లెట్లలో దాగి ఉన్న ప్రతిభను గుర్తించి వారికి ప్రపంచ స్థాయి శిక్షణ, సౌకర్యాలు, పోటీ అవకాశాలు కల్పించడమే ఈ కార్యక్రమం ప్రధాన లక్ష్యమని అధికారులు తెలిపారు. దివ్యాంగ క్రీడాకారులు కూడా అంతర్జాతీయ స్థాయిలో రాణించేలా ప్రభుత్వం పూర్తి స్థాయిలో సహకరిస్తుందని సీఎం హామీ ఇచ్చారు.
యంగ్ ఇండియా ఫిజికల్ ఎడ్యుకేషన్ అండ్ స్పోర్ట్స్ యూనివర్సిటీ (YIPESU) ద్వారా ఫిజికల్ ఎడ్యుకేషన్, స్పోర్ట్స్ సైన్స్, స్పోర్ట్స్ మేనేజ్మెంట్, స్పోర్ట్స్ టెక్నాలజీ, స్పోర్ట్స్ సైకాలజీ, న్యూట్రిషన్, ఫిట్నెస్ తదితర రంగాల్లో ఆధునిక కోర్సులు అందుబాటులోకి రానున్నాయి. దీంతో తెలంగాణ యువతకు ప్రపంచ స్థాయి విద్యతో పాటు ఉపాధి అవకాశాలు కూడా మెరుగుపడనున్నాయి.
యువతలో ఆరోగ్యకరమైన జీవనశైలిని పెంపొందించేందుకు ఫిజికల్ లిటరసీ మిషన్ ను ప్రారంభించారు. ప్రతి విద్యార్థి రోజువారీ జీవితంలో వ్యాయామం, ఫిట్నెస్, క్రీడలను భాగం చేసుకోవాలని ప్రభుత్వం ప్రోత్సహిస్తోంది. పాఠశాల స్థాయి నుంచే ప్రతిభను గుర్తించి ప్రత్యేక శిక్షణ అందించే విధంగా కార్యాచరణ రూపొందిస్తున్నారు.
అలాగే యంగ్ ఇండియా స్పోర్ట్స్ ఫెలోషిప్ ద్వారా క్రీడా రంగంలో పరిశోధనలు, కోచింగ్, మేనేజ్మెంట్, స్పోర్ట్స్ అడ్మినిస్ట్రేషన్ రంగాల్లో యువతకు అవకాశాలు కల్పించనున్నారు. క్రీడలను ఉద్యోగ అవకాశాలతో అనుసంధానం చేస్తూ ప్రభుత్వం ప్రత్యేక ప్రణాళికలు అమలు చేస్తోంది.
క్రీడల్లో రాణించిన వారికి ప్రభుత్వ ఉద్యోగాలతో పాటు భారీ నగదు ప్రోత్సాహకాలు అందిస్తున్నామని ముఖ్యమంత్రి తెలిపారు. క్రీడల్లో ప్రతిభ కనబరిచిన ప్రతి యువకుడికి ప్రభుత్వం అండగా ఉంటుందని, వారి భవిష్యత్తు భద్రంగా ఉండేలా చర్యలు తీసుకుంటామని స్పష్టం చేశారు.
డిసెంబర్ 2028 నాటికి తెలంగాణ స్పోర్ట్స్ అకాడమీని పూర్తి స్థాయిలో ప్రారంభిస్తామని సీఎం వెల్లడించారు. ఈ అకాడమీ ద్వారా ఒలింపిక్స్, ఆసియా క్రీడలు, కామన్వెల్త్ గేమ్స్ వంటి అంతర్జాతీయ పోటీల కోసం ప్రత్యేక శిక్షణ అందించనున్నారు. ప్రపంచ స్థాయి కోచ్లు, ఆధునిక సాంకేతిక పరిజ్ఞానం, స్పోర్ట్స్ సైన్స్ సదుపాయాలతో తెలంగాణను క్రీడా హబ్గా తీర్చిదిద్దాలన్నదే ప్రభుత్వ లక్ష్యమన్నారు.
భవిష్యత్తులో ఒలింపిక్స్ నిర్వహించే స్థాయికి తెలంగాణను తీసుకెళ్లేందుకు ప్రభుత్వం ఇప్పటికే దీర్ఘకాలిక ప్రణాళికను అమలు చేస్తోందని తెలిపారు. క్రీడలు కేవలం వినోదం మాత్రమే కాకుండా ఆరోగ్యం, ఉపాధి, అంతర్జాతీయ గుర్తింపు, రాష్ట్ర ప్రతిష్ఠను పెంచే శక్తివంతమైన రంగమని పేర్కొన్నారు.
ప్రతీ యువకుడు ఒక లక్ష్యాన్ని నిర్దేశించుకుని దాన్ని సాధించేందుకు క్రమశిక్షణతో శ్రమిస్తే ప్రపంచ వేదికపై విజయం సాధించడం అసాధ్యం కాదని సీఎం రేవంత్ రెడ్డి అన్నారు. తెలంగాణ ప్రభుత్వం క్రీడలకు ఇస్తున్న ప్రాధాన్యతతో రాబోయే సంవత్సరాల్లో రాష్ట్రం నుంచి మరింత మంది ఒలింపియన్లు, ప్రపంచ ఛాంపియన్లు తయారవుతారని ఆశాభావం వ్యక్తం చేశారు.
Telangana Sports
