తెలంగాణ రాష్ట్ర మాజీ మంత్రి, మేడ్చల్ బీఆర్ఎస్ ఎమ్మెల్యే చామకూర మల్లారెడ్డి తన విద్యా సంస్థల సామ్రాజ్యాన్ని దేశవ్యాప్తంగా విస్తరించేందుకు అడుగులు వేస్తున్నారు. ఈ క్రమంలో ఆయన ఆంధ్రప్రదేశ్‌లోని ప్రముఖ నగరాలైన తిరుపతి, విశాఖపట్నంలో ఇంజినీరింగ్ కళాశాలలను కొనుగోలు చేశారు.
ఏపీలో తొలి అడుగు: శ్రీవారి సన్నిధిలో కీలక ప్రకటన: తెలంగాణ రాజకీయాల్లో తనదైన శైలి, పంచ్ డైలాగులతో గుర్తింపు తెచ్చుకున్న మల్లారెడ్డి… పాల వ్యాపారిగా మొదలై నేడు తెలుగు రాష్ట్రాల్లో డీమ్డ్ యూనివర్శిటీలు, ఇంజినీరింగ్, మెడికల్ కాలేజీలు, పాఠశాలలు నడుపుతున్న ప్రముఖ విద్యావేత్తగా ఎదిగారు.
తన విద్యా సంస్థల విస్తరణలో భాగంగా ఆయన తిరుపతిలో శ్రీ ఇంజినీరింగ్ కాలేజీని కొనుగోలు చేశారు. ఈ కొనుగోలు రిజిస్ట్రేషన్ ప్రక్రియ సోమవారం పూర్తయినట్లు తెలిపారు. అలాగే, దీనికి ముందు విశాఖపట్నంలో కూడా మరో కళాశాలను కొనుగోలు చేసినట్లు ఆయన ప్రకటించారు.
‘దేశమంతా విస్తరిస్తా, కేసీఆర్ మళ్లీ సీఎం కావాలి’: కుటుంబ సమేతంగా తిరుమల శ్రీవారిని దర్శించుకున్న అనంతరం ఆలయం వెలుపల మీడియాతో మాట్లాడిన మాజీ మంత్రి మల్లారెడ్డి, దేశమంతా యూనివర్శిటీలు, కాలేజీలు స్థాపించాలనే ఆకాంక్షను వ్యక్తం చేశారు. “ఆ తిరుమల శ్రీవారి దయతో తాను దేశమంతా యూనివర్సిటీలు, కాలేజీలు పెట్టబోతున్నాను” అని ఆయన అన్నారు.
ఈ సందర్భంగా ఆయన తెలంగాణ రాజకీయాలపై కూడా స్పందించారు. తెలంగాణలో మళ్లీ కేసీఆర్ అధికారంలోకి రావాలని తిరుమల శ్రీవారిని కోరుకున్నట్లు తెలిపారు.
తన లక్ష్యాన్ని మల్లారెడ్డి వివరించారు. పేద ప్రజలకు విద్య, వైద్యం అందించాలనే ఉద్దేశంతోనే ఈ అడుగులు వేస్తున్నట్లు తెలిపారు. “తాను ప్రజా సేవ చేయడానికి యూనివర్శిటీలు, కాలేజీలు నడిపిద్దామనుకుంటున్నాను. పాల మల్లారెడ్డిని కాస్త విద్యావేత్తగా ఎదిగాను. దేశవ్యాప్తంగా డీమ్డ్ వర్సిటీలు, ఆస్పత్రులు స్థాపించి పేద ప్రజలకు విద్య, వైద్యాన్ని అందిస్తాను” అని ఆయన పేర్కొన్నారు.
మల్లారెడ్డి కొనుగోలు చేసిన తిరుపతిలోని శ్రీ కాలేజీలో ఇకపై ‘మల్లారెడ్డి బ్రాండ్‌’తో విద్యా సంస్థను నడపాలని భావిస్తున్నట్లు తెలుస్తోంది. ఇప్పటికే ఉన్న కళాశాలలను కొనుగోలు చేయడంతో పాటు, కొత్తగా కూడా విద్యా సంస్థలను ఏర్పాటు చేయాలని ఆయన యోచిస్తున్నారు. ఏపీ తర్వాత ఇతర రాష్ట్రాలలోనూ తన విద్యా సంస్థల విస్తరణపై ఆయన దృష్టి సారించారు.
