తెలంగాణకు చెందిన ఓ యువకుడు ఇన్ఫోసిస్‌లో ఉద్యోగం కోసం తన అతి తెలివిని ప్రవర్తించాడు. తన బదులు స్నేహితుడిని వర్చువల్ ఇంటర్వ్యూకు పంపాడు. ఉద్యోగంలో చేరిన తర్వాత అనుమానం వచ్చిన అధికారులు, వర్చువల్ ఇంటర్వ్యూ స్క్రీన్‌షాట్‌లను అతడి అసలు ఫోటోతో పోల్చి చూశారు. అప్పుడు అసలు మోసం బయటపడింది. ఇంటర్వ్యూకు హాజరైంది అతడు కాదని.. మరొక వ్యక్తి అని తేలింది. అప్పటికే అతడు దాదాపు 15 రోజులు ఉద్యోగం చేశాడు. ఇలాంటి మోసాలు భవిష్యత్తులో జరగకుండా నిరోధించడానికి కంపెనీలు మరింత అప్రమత్తంగా ఉండాల్సిన అవసరం ఉంది.
కరోనా మహమ్మారి ప్రపంచాన్ని అతలాకుతలం చేసిన తర్వాత.. అనేక రంగాల్లో మార్పులు చోటుచేసుకున్నాయి. ముఖ్యంగా ఉద్యోగ నియామక ప్రక్రియలో వర్చువల్ ఇంటర్వ్యూలు సాధారణమయ్యాయి. అయితే.. ఈ విధానాన్ని కొందరు మోసగాళ్లు తమ స్వార్థానికి వాడుకుంటున్నారు.
తాజాగా.. తెలంగాణకు చెందిన రాపా సాయి ప్రశాంత్ అనే యువకుడు ప్రముఖ ఐటీ సంస్థ ఇన్ఫోసిస్‌లో ఉద్యోగం సంపాదించడానికి అడ్డదారి తొక్కాడు. వర్చువల్ ఇంటర్వ్యూకు తన బదులు మరొకరిని పంపి సంస్థను మోసగించాడు. కానీ.. ఈ మోసం ఎక్కువ కాలం నిలవలేదు. ఉద్యోగంలో చేరిన కొద్ది రోజులకే అసలు విషయం బయటపడటంతో ఇన్ఫోసిస్ అతడిని తొలగించి పోలీసులకు ఫిర్యాదు చేసింది. పూర్తి వివరాల్లోకి వెళ్తే..
ప్రశాంత్ ఇన్ఫోసిస్‌లో సాఫ్ట్‌వేర్ ఇంజనీర్ ఉద్యోగం కోసం దరఖాస్తు చేసుకున్నాడు . ఓ జాబ్ పోర్టల్ ద్వారా సంప్రదా సాఫ్ట్‌వేర్ టెక్నాలజీస్ అనే రిక్రూట్‌మెంట్ సంస్థకు తన రెజ్యూమ్‌ను పంపించాడు. వారి ద్వారా అతని దరఖాస్తు ఇన్ఫోసిస్‌కు చేరుకుంది. ఈ ఏడాది జనవరిలో ఇన్ఫోసిస్ వర్చువల్ ఇంటర్వ్యూ నిర్వహించింది. ఇక్కడే అతడు తన తెలివిని ఉపయోగించాడు.
రాపా సాయి ప్రశాంత్ ఇంటర్వ్యూకు హాజరుకాకుండా.. తన స్నేహితుడిని తనలా నటించమని కోరాడు. ఆ స్నేహితుడు ఇంటర్వ్యూలో అద్భుతంగా మాట్లాడటంతో.. ఇన్ఫోసిస్ అతడిని ఎంపిక చేసి ఆఫర్ లెటర్ ఇచ్చింది. అతడు ఉద్యోగంలో చేరిన కొద్ది రోజుల్లోనే ఇన్ఫోసిస్ ఉద్యోగులకు అనుమానం వచ్చింది. ఇంటర్వ్యూలో ఎంతో బాగా మాట్లాడిన అతడు.. ఉద్యోగంలో మాత్రం సరిగా కమ్యూనికేట్ చేయలేకపోతున్నాడు. అతని పనితీరు కూడా ఆశాజనకంగా లేదు. దీంతో అనుమానం వచ్చిన అధికారులు, వర్చువల్ ఇంటర్వ్యూ స్క్రీన్‌షాట్‌లను అతడి అసలు ఫోటోతో పోల్చి చూశారు. అప్పుడు అసలు మోసం బయటపడింది. ఇంటర్వ్యూకు హాజరైంది అతడు కాదని.. మరొక వ్యక్తి అని తేలింది. అప్పటికే అతడు దాదాపు 15 రోజులు ఉద్యోగం చేశాడు.
ఈ మోసం వెలుగులోకి రావడంతో ఇన్ఫోసిస్ వెంటనే సదరు ఉద్యోగిని ఉద్యోగం నుంచి తొలగించింది. ఈ ఘటన బెంగళూరులో జరిగింది. రిక్రూట్‌మెంట్ సంస్థ సంప్రదా సాఫ్ట్‌వేర్ టెక్నాలజీస్ తరపున అకౌంట్స్ మేనేజర్ కిశోర్ బెంగళూరులోని అడుగోడి పోలీస్ స్టేషన్‌లో ఫిర్యాదు చేశారు. మోసం చేసిన వ్యక్తిపై చీటింగ్, ఇంపర్సొనేషన్ కింద కేసు నమోదు చేశారు. పోలీసులు ఐటీ చట్టం, భారతీయ న్యాయ సంహితలోని సెక్షన్లు 318, 319 కింద దర్యాప్తు చేస్తున్నారు. కరోనా కాలం నేర్పిన టెక్నాలజీని కొందరు ఇలా దుర్వినియోగం చేస్తూ వస్తున్నారు. ఇలాంటి మోసాలు భవిష్యత్తులో జరగకుండా నిరోధించడానికి కంపెనీలు మరింత అప్రమత్తంగా ఉండాల్సిన అవసరం ఉంది.
అయితే ఉద్యోగం నుంచి తొలగించడంతో ప్రశాంత్ హైదరాబాబాద్ వెళ్లాడని… అయితే అతను తన 15 రోజుల పనికి జీతం ఇవ్వాలని పట్టుబట్టాడని, తాము అతన్ని పట్టుకోవడానికి ప్రయత్నిస్తున్నామని సీనియర్ పోలీసు అధికారి చెప్పినట్టుగా సమాచారం.
