Vote Value Awareness అంటే కేవలం ఎన్నికల రోజు ఓటు వేయడం గురించి తెలుసుకోవడం మాత్రమే కాదు. మన చేతిలో ఉన్న ఒక్క ఓటు ఎంత శక్తివంతమైనదో, దాన్ని ఎలా ఉపయోగించాలో తెలుసుకోవడం కూడా. ఓటు ఒక చిన్న కాగితం ముక్క కాదు. ప్రజాస్వామ్యంలో ప్రజలకు లభించిన అత్యంత శక్తివంతమైన ఆయుధం ఓటు.అది కేవలం ఒక బటన్ నొక్కడం కాదు. ఒక ప్రభుత్వాన్ని ఎన్నుకునే శక్తి. ఒక నాయకుడికి అధికారం అప్పగించే నిర్ణయం. రాబోయే ఐదేళ్లపాటు మన జీవితాలను ప్రభావితం చేసే విధానాలను నిర్ణయించే అవకాశం.
అందుకే ఓటు ఒక వజ్రాయుధం. ప్రజల చేతిలో ఉన్న ప్రజాస్వామ్య బ్రహ్మాస్త్రం.
కానీ అదే ఓటును కొన్ని వందలు, కొన్ని వేల రూపాయలు, మద్యం లేదా ఇతర తాత్కాలిక ప్రలోభాలకు అమ్ముకుంటే నష్టపోయేది చివరికి ఓటరే. ఎన్నికల రోజు చేతికి వచ్చిన డబ్బు ఒకరోజు అవసరాన్ని తీర్చవచ్చు. కానీ తప్పు నాయకుడిని ఎన్నుకుంటే ఆ నిర్ణయం ప్రభావం ఐదేళ్లపాటు ప్రజల జీవితాలపై పడవచ్చు.ప్రజాస్వామ్యంలో ఎన్నికలు కేవలం నాయకులను ఎన్నుకునే ప్రక్రియ కాదు. ప్రజల ఆకాంక్షలకు ప్రతినిధులను ఎంపిక చేసే పవిత్రమైన అవకాశం. ఎవరు పాలించాలి? ఎవరు ప్రజల సమస్యలను పరిష్కరించాలి? ఎవరు రాష్ట్రాన్ని, దేశాన్ని అభివృద్ధి వైపు నడిపించాలి? ఎవరు ప్రజాధనాన్ని బాధ్యతగా వినియోగించాలి? అనే ప్రశ్నలకు ప్రజలు తమ ఓటుతో సమాధానం చెబుతారు.
ప్రజల ఆకాంక్షలకు అనుగుణంగా ప్రభుత్వాలు ఏర్పడాలన్న మహోన్నత లక్ష్యంతో ఎన్నికల వ్యవస్థ ఏర్పడింది. ప్రజలు తమకు నచ్చిన నాయకుడిని ఎన్నుకోవాలి. ప్రజా సమస్యలను అర్థం చేసుకునే వ్యక్తికి బాధ్యత అప్పగించాలి. ప్రజల పన్నులతో నడిచే ప్రభుత్వాన్ని ప్రజల కోసమే పనిచేసేలా నిలదీయాలి.
అందుకే Vote Value Awareness ప్రతి పౌరుడిలో ఉండాలి.
ఎన్నికల సమయంలో డబ్బు, మద్యం, బహుమతులు, కులం, మతం, వర్గం, వ్యక్తిగత ప్రయోజనాలు ఓటును ప్రభావితం చేయడం ప్రజాస్వామ్య విలువలకు తీవ్రమైన ముప్పు.ఒక ఓటరు కొన్ని వందల రూపాయలకు తన ఓటును విక్రయించినప్పుడు, తాను కేవలం ఒక ఓటును మాత్రమే అమ్ముకున్నానని అనుకోవచ్చు. కానీ వాస్తవానికి ఆ నిర్ణయంతో తన కుటుంబ భవిష్యత్తు, పిల్లల విద్య, ఉద్యోగ అవకాశాలు, మెరుగైన వైద్య సేవలు, మంచి రహదారులు, తాగునీటి సదుపాయం, ప్రాంత అభివృద్ధి వంటి అనేక అవకాశాలను పరోక్షంగా తాకట్టు పెట్టే ప్రమాదం ఉంది.ఎన్నికల ముందు వచ్చిన డబ్బు తాత్కాలిక ప్రయోజనం మాత్రమే. కానీ ఓటు తప్పు చేతుల్లోకి వెళ్లడం వల్ల ఏర్పడే పాలనా ప్రభావం సంవత్సరాల పాటు ఉంటుంది.
ప్రతి పౌరుడు తనను తాను ఒక ప్రశ్న అడగాలి.
“నాకు ఈరోజు వచ్చే కొంత డబ్బు ముఖ్యమా? లేక నా కుటుంబానికి వచ్చే ఐదేళ్ల భవిష్యత్తు ముఖ్యమా?”
ఓటు కొనుగోలు ఒక సాధారణ రాజకీయ సంస్కృతిగా మారితే దాని ప్రభావం చాలా ప్రమాదకరం. ప్రజాసేవ చేయాలనే ఉద్దేశంతో రాజకీయాల్లోకి వచ్చే వ్యక్తుల కంటే, ఎన్నికల్లో భారీగా డబ్బు ఖర్చు చేసి అధికారాన్ని సంపాదించాలనుకునే వారికి ప్రాధాన్యం పెరిగే ప్రమాదం ఉంది.ఎన్నికల్లో పెట్టిన డబ్బును తిరిగి సంపాదించుకోవాలనే ఆలోచన పాలనలోకి ప్రవేశిస్తే అవినీతి, అక్రమాలు, ప్రజాధనం దుర్వినియోగం వంటి సమస్యలకు అవకాశం ఏర్పడవచ్చు.అప్పుడు ప్రజాప్రతినిధి ప్రజలకు జవాబుదారీగా ఉండాల్సిన బదులు ఎన్నికల సమయంలో తనకు ఆర్థికంగా సహకరించిన ప్రయోజన వర్గాలకు జవాబుదారీగా మారే ప్రమాదం ఉంది.
అందుకే Vote Value Awareness అనేది కేవలం ఎన్నికల ప్రచార నినాదం కాకుండా ప్రజాస్వామ్య పరిరక్షణకు అవసరమైన సామాజిక చైతన్యంగా మారాలి.ప్రజాస్వామ్యంలో ఓటు విలువను నిర్ణయించేది నోటు కాదు. నైతికత, అవగాహన, బాధ్యతాయుతమైన ఆలోచన.పేదరికం, ఆర్థిక ఇబ్బందులు, తక్షణ అవసరాలు ప్రజలను ప్రలోభాలకు గురి చేయవచ్చు. అయితే ప్రజల ఆర్థిక బలహీనతలను ఉపయోగించుకుని ఓట్లు కొనడం రాజకీయ పరిష్కారం కాదు.నిజమైన రాజకీయ సేవ అంటే ప్రజలకు ఎన్నికల సమయంలో కొంత డబ్బు ఇవ్వడం కాదు. వారి సమస్యలను శాశ్వతంగా పరిష్కరించే పాలన అందించడం.ఉద్యోగాలు కల్పించడం, విద్యా వ్యవస్థను మెరుగుపరచడం, వైద్య సేవలను అందుబాటులోకి తీసుకురావడం, వ్యవసాయాన్ని బలోపేతం చేయడం, మౌలిక వసతులు కల్పించడం—ఇవే నిజమైన అభివృద్ధి రాజకీయాలు.
మన సమాజంలో కులం, మతం, ప్రాంతం, వర్గం వంటి అంశాలు ప్రజల భావోద్వేగాలతో ముడిపడి ఉంటాయి. కానీ ఎన్నికల్లో ఇవే ప్రధాన నిర్ణయాలకు ఆధారంగా మారితే ప్రజాస్వామ్యానికి నష్టం కలుగుతుంది.కేవలం “మనవాడు” అనే కారణంతో ఒక నాయకుడిని ఎన్నుకోవడం ప్రమాదకరం.మనవాడైనా తప్పు చేస్తే ప్రశ్నించాలి. మనవాడు కాకపోయినా మంచి చేస్తే అభినందించాలి. అదే నిజమైన ప్రజాస్వామ్య సంస్కారం.అభ్యర్థిని ఎన్నుకునేటప్పుడు కులం కంటే సామర్థ్యాన్ని చూడాలి. మతం కంటే నిజాయితీని చూడాలి. పార్టీ కంటే ప్రజా సమస్యలపై ఉన్న అవగాహనను పరిశీలించాలి.
ప్రతి ఓటరులో Vote Value Awareness పెరగాలంటే అభ్యర్థిని ప్రశ్నించే అలవాటు రావాలి.
అభ్యర్థికి ప్రజా సమస్యలపై అవగాహన ఉందా? గతంలో ప్రజల కోసం ఏం చేశారు? ఎన్నికల సమయంలో మాత్రమే ప్రజల వద్దకు వస్తున్నారా? ప్రజలకు అందుబాటులో ఉంటారా? అభివృద్ధికి స్పష్టమైన ప్రణాళిక ఉందా? ఎన్నికల్లో ఇచ్చే హామీలను అమలు చేసే సామర్థ్యం ఉందా?
ఈ ప్రశ్నలకు సమాధానాలు వెతికిన తర్వాతే ఓటరు నిర్ణయం తీసుకోవాలి.
ప్రజాస్వామ్యాన్ని కాపాడాల్సింది కేవలం ఎన్నికల సంఘం మాత్రమే కాదు. రాజకీయ పార్టీలు మాత్రమే కాదు. ప్రభుత్వాలు మాత్రమే కాదు. ప్రతి ఓటరూ ప్రజాస్వామ్యానికి ఒక కాపలాదారుడు.ఓటు వేసిన తర్వాత కూడా ప్రజల బాధ్యత ముగియదు. ఎన్నికైన ప్రతినిధిని ప్రశ్నించాలి. ఇచ్చిన హామీలను గుర్తు చేయాలి. ప్రభుత్వ పనితీరును పరిశీలించాలి.ప్రజాస్వామ్యం అంటే ఐదేళ్లకోసారి ఓటు వేయడం మాత్రమే కాదు. ఐదేళ్లపాటు ప్రభుత్వాన్ని జవాబుదారీగా ఉంచడం కూడా.సమాజంలో ఆలోచించే వర్గం మౌనం వహిస్తే ప్రజాస్వామ్యంలో ఖాళీ ఏర్పడుతుంది. మేధావులు, ఉపాధ్యాయులు, జర్నలిస్టులు, రచయితలు, సామాజిక కార్యకర్తలు, యువత—ప్రతి ఒక్కరూ ఓటు విలువపై నిరంతరం చైతన్యం కలిగించాలి.ఎన్నికల సమయంలో మాత్రమే కాదు. ఎన్నికలు లేని సమయంలో కూడా ప్రజాస్వామ్యంపై చర్చ జరగాలి.
ఓటు హక్కును ఎలా ఉపయోగించాలి? అభ్యర్థిని ఎలా అంచనా వేయాలి? ప్రజా ప్రతినిధిని ఎలా ప్రశ్నించాలి? ప్రభుత్వాన్ని ఎలా జవాబుదారీగా నిలపాలి?ఈ అంశాలపై ప్రజల్లో అవగాహన పెరగాలి.యువ ఓటర్లు రాజకీయ నిర్ణయాలను కేవలం సోషల్ మీడియా ప్రచారం ఆధారంగా తీసుకోకూడదు. వైరల్ వీడియోలు, ప్రచారాలు, భావోద్వేగ నినాదాల కంటే వాస్తవాలను పరిశీలించాలి.
ఒక అభ్యర్థి గురించి పూర్తి సమాచారం తెలుసుకోవాలి. హామీలను పరిశీలించాలి. వివిధ కోణాల్లో ఆలోచించాలి.
యువతలో పెరిగే Vote Value Awareness భవిష్యత్ రాజకీయాలను కూడా మార్చగలదు.
ఎందుకంటే వివేకంతో ఓటు వేసే ఓటరును కొనుగోలు చేయడం కష్టం. ప్రశ్నించే ఓటరును మోసం చేయడం కష్టం. సమాచారం తెలుసుకున్న ఓటరును తప్పుదోవ పట్టించడం మరింత కష్టం.ఎన్నికల రోజు చేతిలో ఉండేది ఒక్క ఓటు మాత్రమే కావచ్చు. కానీ ఆ ఒక్క ఓటుతో మంచి పాలనకు అవకాశం ఇవ్వవచ్చు. ఒక చెడు పాలనను అడ్డుకోవచ్చు. ఒక ప్రాంత భవిష్యత్తును మార్చవచ్చు.నోటుకు ఓటు అమ్మితే ఐదేళ్ల పాలనను కోల్పోయే ప్రమాదం ఉంది. ప్రలోభాలకు ఓటు అమ్మితే ప్రశ్నించే నైతిక హక్కు బలహీనపడుతుంది. కులం, మతం పేరుతో మాత్రమే ఓటేస్తే అభివృద్ధి అవకాశాలు వెనుకబడవచ్చు.కానీ వివేకంతో ఓటేస్తే మన భవిష్యత్తును మనమే ఎన్నుకున్నట్లవుతుంది.
Vote Value Awareness ప్రతి పౌరుడిలో పెరగాల్సిన అవసరం ఉంది. ఓటు మన ఆత్మగౌరవానికి ప్రతీక. ఓటు మన భవిష్యత్తుకు బాట. ఓటు ప్రజాస్వామ్యానికి ప్రాణం.ఓటు ఒక వజ్రాయుధం.ఆ వజ్రాయుధాన్ని చిల్లర కాసుల కోసం తాకట్టు పెట్టకండి.ఎన్నికల సమయంలో వచ్చే తాత్కాలిక ప్రలోభాల కంటే మన కుటుంబ భవిష్యత్తు గొప్పది. మన ప్రాంత అభివృద్ధి గొప్పది. మన పిల్లల భవిష్యత్తు గొప్పది. మన ప్రజాస్వామ్యం అంతకంటే గొప్పది.
ఓటు అమ్మకానికి కాదు. ఓటు మన ఆత్మగౌరవానికి ప్రతీక. ఓటు మన భవిష్యత్తుకు బాట. ఓటు ప్రజాస్వామ్యానికి ప్రాణం. ఆ ప్రాణాన్ని నోట్ల కట్టలకు అమ్ముకోవద్దు.
— నరసింహారెడ్డి చందమూరి
ఫ్రీలాన్స్ జర్నలిస్టు, కదిరి
