వెనిజులా తీరంలో డ్రగ్స్ స్మగ్లింగ్ చేస్తున్న ఓ బోటుపై అమెరికా సైన్యం మెరుపుదాడి చేసి పేల్చివేసింది. ఈ ఘటనలో 11 మంది నార్కో-టెర్రరిస్టులు మరణించినట్లు అమెరికా అధ్యక్షుడు డొనాల్డ్ ట్రంప్ వెల్లడించారు. ఈ దాడి అమెరికా-వెనిజులా మధ్య ఉద్రిక్తతలను మరింత పెంచే అవకాశం ఉంది.
ఈ దాడి వెనిజులాకు చెందిన ట్రెన్ డీ అరాగ్వా (TDA) కార్టెల్ అనే ఉగ్రవాద సంస్థకు చెందిన డ్రగ్స్ బోటుపై జరిగింది. ఈ సంస్థ అమెరికాలో హత్యలు, సెక్స్ ట్రాఫికింగ్, ఉగ్రవాద దాడులకు పాల్పడుతోందని ట్రంప్ ఆరోపించారు. వెనిజులా నాయకుడు నికోలస్ మదురో నాయకత్వంలోనే ఈ అక్రమ కార్యకలాపాలు జరుగుతున్నాయని ఆయన పేర్కొన్నారు.
అంతర్జాతీయ జలాల్లో తరచూ డ్రగ్స్ స్మగ్లింగ్‌ను అడ్డుకునేందుకు అమెరికా సైన్యం కరేబియన్ సముద్రం, వెనిజులా తీరంలో ఆపరేషన్లు నిర్వహిస్తోంది. ఈ దాడి కూడా అందులో భాగమేనని అధికారులు తెలిపారు. ఈ ఘటనతో రెండు దేశాల మధ్య సంబంధాలు మరింత క్షీణించే అవకాశం ఉంది.
-ట్రంప్ సోషల్ మీడియా పోస్ట్:
ట్రంప్ తన ట్రూత్ సోషల్ నెట్‌వర్క్‌లో ఈ దాడి గురించి ఒక ప్రకటనను, డ్రోన్ ఫుటేజ్‌ను విడుదల చేశారు. “నా ఆదేశాల మేరకు, అమెరికా సైనిక దళాలు ట్రెన్ డీ అరాగ్వా నార్కోటెర్రరిస్టులపై కచ్చితమైన దెబ్బ కొట్టాయి,” అని ట్రంప్ పేర్కొన్నారు. ఈ దాడి అంతర్జాతీయ జలాల్లో జరిగిందని, ఈ దాడిలో 11 మంది టెర్రరిస్టులు చనిపోయారని ఆయన తెలిపారు. ఈ ఘటనలో ఏ ఒక్క అమెరికా సైనికుడికి కూడా హాని జరగలేదని ఆయన స్పష్టం చేశారు
