తెలంగాణ రాష్ట్ర రాజకీయాలు ప్రస్తుతం ఊహించని మలుపులు తిరుగుతున్నాయి. ప్రతిపక్ష బీఆర్ఎస్లో అంతర్గత విభేదాలు బహిరంగంగా చర్చకు రావడం రాష్ట్ర రాజకీయ వర్గాల్లో హాట్ టాపిక్గా మారింది. ముఖ్యంగా మాజీ ముఖ్యమంత్రి కేసీఆర్ వారసులుగా భావిస్తున్న ఆయన కుమారుడు, పార్టీ కార్యనిర్వాహక అధ్యక్షుడు కేటీఆర్, కుమార్తె జాగృతి అధినేత్రి కల్వకుంట్ల కవిత మధ్య విభేదాలు తీవ్రస్థాయిలో ఉన్నాయన్న వార్తలు రాజకీయ విశ్లేషకులలో చర్చకు దారితీస్తున్నాయి. ఈ విభేదాలు తాత్కాలికమా లేక శాశ్వతమా అన్నది భవిష్యత్తులో తేలినా, ప్రస్తుత పరిణామాలు మాత్రం కవిత రాజకీయ భవిష్యత్తుపై తీవ్ర ప్రభావం చూపేలా ఉన్నాయి
కవిత-కేటీఆర్ మధ్య విభేదాలు బహిరంగంగా బయటపడటానికి రాఖీ పౌర్ణమి రోజు జరిగిన సంఘటన ప్రధాన కారణం. తన సోదరుడికి రాఖీ కట్టేందుకు తాను వస్తున్నానని కవిత సందేశం పంపితే, కేటీఆర్ తాను “ఆవుట్ ఆఫ్ స్టేషన్” అంటూ సమాధానం చెప్పారన్న వార్తలు మీడియాలో విస్తృతంగా ప్రచారమయ్యాయి. ఈ వార్తలను ఎవరూ ఖండించకపోవడం ఈ విభేదాలకు బలం చేకూర్చింది. కేవలం ఈ సంఘటన మాత్రమే కాకుండా కవిత తన కుమారుడి ఉన్నత చదువుల కోసం అమెరికాకు వెళ్లే ముందు, కేసీఆర్ ఆశీస్సులు తీసుకోవడానికి ఎర్రవల్లి ఫార్మ్ హౌస్కి వెళ్లడం.. అక్కడ కవితకు ఆదరణ లేకపోవడంతో కుటుంబంలో అంతర్గత వివాదాలు చల్లరలేదని సూచిస్తుంది.
కవిత రాజకీయ ప్రయాణంలో కీలకమైన సింగరేణి కార్మిక సంఘం గౌరవాధ్యక్ష పదవిని ఆమె నుంచి తీసివేయడం ఒక పెద్ద ఎదురుదెబ్బ. ఈ పదవిని కేటీఆర్, మంత్రి కొప్పుల ఈశ్వర్కు అప్పగించడం కవితకు ఊహించని షాక్. సాధారణంగా సింగరేణి కార్మిక సంఘం బాధ్యతలు కవితకే అప్పగిస్తారన్న అంచనాలు ఉన్నప్పటికీ, కేటీఆర్ తీసుకున్న ఈ నిర్ణయం ఇద్దరి మధ్య అంతర్గత పోరును స్పష్టం చేసింది. అయితే కవిత దీన్ని ఒక సవాలుగా తీసుకుని ఇతర సింగరేణి కార్మిక సంఘ నాయకులతో సమావేశమై తన ప్రభావాన్ని కొనసాగించేందుకు ప్రయత్నించారు. ఈ సంఘటన కవితకు రాజకీయంగా ఒక పెద్ద దెబ్బ అయినప్పటికీ, ఆమె పోరాటం ఆపలేదన్న సంకేతాలను ఇచ్చింది.
సింగరేణి నుంచి కవితను తప్పించడంతో ఆమె రాజకీయంగా వెనక్కి తగ్గుతారని భావించడం తొందరపాటే అవుతుంది. ఆమె తన సొంత రాజకీయ స్థావరాన్ని ఏర్పాటు చేసుకునేందుకు ఇప్పటికే జాగృతి ద్వారా వివిధ కార్యక్రమాలను నిర్వహిస్తున్నారు. బీసీలకు రిజర్వేషన్ల కోసం కవిత నిరంతరంగా పోరాడుతున్నారు. ఈ పోరాటం ద్వారా ఆమె బీసీ వర్గాల మద్దతును కూడగట్టుకునే ప్రయత్నం చేస్తున్నారు. ఇది ఆమెకు ఒక బలమైన ఓటు బ్యాంకుగా మారే అవకాశం ఉంది. తెలంగాణ ఉద్యమంలో కళాకారుల పాత్ర కీలకమైనది. కవిత కళాకారులతో సమావేశమై వారి సమస్యలను పరిష్కరించేందుకు ప్రయత్నిస్తున్నారు. ఇది కళాకారుల మద్దతును పొందేందుకు ఒక వ్యూహాత్మక అడుగు. కాలేశ్వరం నోటీసులపై నిరసనలు, ఇతర రాజకీయ ఆందోళనల ద్వారా కవిత నిరంతరం ప్రజల్లో ఉండటానికి ప్రయత్నిస్తున్నారు. ఈ ఆందోళనలు ఆమె నాయకత్వ సామర్థ్యాన్ని, ప్రజా సమస్యల పట్ల ఆమెకున్న నిబద్ధతను తెలియజేస్తాయి.
“కవిత-కేటీఆర్ మధ్య విభేదాలు ఒక ఆధిపత్య పోరుగా కనిపిస్తున్నాయి. కేటీఆర్ పార్టీలో తన స్థానాన్ని మరింత పటిష్టం చేసుకోవడానికి ప్రయత్నిస్తుంటే, కవిత తనకంటూ ఒక ప్రత్యేక స్థానాన్ని ఏర్పరచుకోవడానికి ప్రయత్నిస్తున్నారు,” అని ఒక రాజకీయ విశ్లేషకుడు అభిప్రాయపడ్డారు. “సింగరేణి ఘటనతో కవిత రాజకీయంగా మరింత చురుకైయ్యే అవకాశం ఉంది. ఆమె అమెరికా నుంచి తిరిగి వచ్చిన తర్వాత తీసుకునే నిర్ణయాలు, జాగృతి ద్వారా చేపట్టే కార్యక్రమాలే ఆమె భవిష్యత్తును నిర్ణయిస్తాయి” అని మరొక విశ్లేషకుడు అన్నారు. మొత్తానికి, కవిత సింగరేణి నుంచి బయటపడినా, ఆమె రాజకీయంగా వెనక్కి తగ్గే పరిస్థితి కనిపించడం లేదు. ఆమె తన సొంత బలాన్ని పెంచుకోవడానికి అన్ని విధాలా ప్రయత్నాలు చేస్తున్నారు. ఆమె తీసుకునే నిర్ణయాలు తెలంగాణ రాజకీయాల్లో ఎలాంటి మార్పులు తీసుకువస్తాయో, ముఖ్యంగా బీఆర్ఎస్ అంతర్గత రాజకీయాలపై ఎలాంటి ప్రభావం చూపుతాయో వేచి చూడాలి. ఈ కుటుంబ విభేదాలు కేసీఆర్ వారసత్వ రాజకీయాలకు ఒక పెద్ద సవాలుగా మారే అవకాశం ఉంది.
