ఐసీసీ ఛాంపియన్స్ ట్రోఫీ 2025 ప్రారంభానికి ముందు భారత క్రికెట్ జట్టు అనేక అనుమానాలతో కూడిన పరిస్థితిలో ఉంది. శ్రీలంకతో వన్డే సిరీస్ అలాగే న్యూజిలాండ్తో హోమ్ టెస్ట్ సిరీస్, ఆస్ట్రేలియాతో బోర్డర్ గవాస్కర్ ట్రోఫీలో ఓటముల అనంతరం టీమిండియా సీనియర్ల భవిష్యత్తుపై ప్రశ్నలు వచ్చాయి. కానీ ఆదివారం నాటి ఫైనల్లో న్యూజిలాండ్ను ఓడించి, నాలుగు వికెట్ల తేడాతో ఘన విజయం సాధించడంతో భారత క్రికెట్ మళ్లీ అగ్రస్థానాన్ని చేరుకుంది.
టోర్నమెంట్ ప్రారంభానికి ముందే రోహిత్ శర్మ, విరాట్ కోహ్లీ భవిష్యత్తుపై ఊహాగానాలు వెల్లువెత్తాయి. వారి రిటైర్మెంట్ గురించి అనేక ఊహాగానాలు వచ్చాయి. కానీ భారత్ విజయం అనంతరం వీరిద్దరూ మౌనం వీడుతూ భవిష్యత్తుపై ఆసక్తికర వ్యాఖ్యలు చేశారు. విజయోత్సవం సందర్భంగా విరాట్ కోహ్లీ మాట్లాడుతూ, జట్టు మంచి ఫామ్ లో ఉందని, తమ అనుభవాన్ని పంచుకోవడం వల్ల యువ ఆటగాళ్లు మరింత మెరుగుపడుతున్నారని చెప్పాడు.
ఆసీస్ టూర్ తరువాత మళ్లీ బలంగా తిరిగి రావాలనే ఉద్దేశంతో ఛాంపియన్స్ ట్రోఫీని గెలవాలని పట్టుదలతో ఉన్నామని వివరించాడు. “ఈ టీమ్ చాలా టాలెంట్తో నిండి ఉంది. ప్రతీ ఆటగాడు తన స్థాయిని పెంచుకునేందుకు ప్రయత్నిస్తున్నాడు. మేము సీనియర్ ఆటగాళ్లుగా తమ అనుభవాన్ని పంచుకోవడం ఇష్టపడతాం. ఇలాంటి టైటిల్స్ కోసం ఆడటమే అసలైన క్రికెట్ మజా. ఒత్తిడిలో నిలబడి రాణించడమే నిజమైన సవాల్. ఈ టోర్నమెంట్లో ప్రతి ఒక్కరూ ఏదో ఒక సమయంలో కీలక ప్రదర్శన ఇచ్చారు. మా కృషికి ఇంతటి ఫలితం రావడం ఆనందంగా ఉంది” అని కోహ్లీ పేర్కొన్నాడు.
వీరి భవిష్యత్తుపై కోహ్లీ మరింత క్లారిటీ ఇస్తూ, జట్టు వచ్చే ఎనిమిదేళ్లపాటు ప్రపంచస్థాయిలో రాణించే స్థాయిలో ఉందని చెప్పాడు. శుభ్మన్ గిల్, శ్రేయస్ అయ్యర్, కేఎల్ రాహుల్, హార్దిక్ పాండ్య తదితరులు అద్భుత ప్రదర్శన ఇచ్చారని, వారితో టీమిండియా మరింత శక్తిమంతంగా మారిందని వివరించాడు. రిటైర్మెంట్ గురించి ఎలాంటి ప్రకటన రాకపోయినా, భవిష్యత్తులో వారు మద్దతుగా ఉంటారని సంకేతాలు ఇచ్చారు. ఇది చూస్తే, 2027 వన్డే వరల్డ్ కప్ వరకు వీరు కొనసాగే అవకాశం ఉందనే అభిప్రాయం వ్యక్తమవుతోంది.
టీమిండియా ఛాంపియన్స్ ట్రోఫీ 2025 ఫైనల్లో న్యూజిలాండ్ను ఓడించి ట్రోఫీతో పాటు భారీ ప్రైజ్ మనీని కూడా సొంతం చేసుకుంది. విజేతగా నిలిచిన భారత జట్టు రూ. 20 కోట్లు ($2.25 మిలియన్) గెలుచుకుంది. ఈ గెలుపుతో రోహిత్ సేన మరోసారి ఐసీసీ ట్రోఫీపై ఆధిపత్యాన్ని ప్రదర్శించింది. మరోవైపు, ఫైనల్లో ఓడిన న్యూజిలాండ్ జట్టుకు రన్నరప్గా నిలిచి రూ. 12 కోట్ల ( $1.12 మిలియన్) ప్రైజ్ మనీ లభించింది.
ఈసారి ఐసీసీ ఛాంపియన్స్ ట్రోఫీ మొత్తం ప్రైజ్ మనీ రూ. 60 కోట్లు ($6.9 మిలియన్)గా నిర్ణయించబడింది. సెమీఫైనల్కు చేరుకుని ఓడిపోయిన ఇంగ్లాండ్, దక్షిణాఫ్రికా జట్లు చెరో రూ. 4.6 కోట్లు ( $560,000) పొందాయి. అలాగే, ఐదో, ఆరో స్థానాల్లో నిలిచిన జట్లకు రూ. 2.9 కోట్లు, ఏడో, ఎనిమిదో స్థానాల్లో నిలిచిన జట్లకు రూ. 1.1 కోట్లు లభించాయి.
ఈ టోర్నమెంట్లో భాగంగా పాల్గొన్న అన్ని జట్లకు కనీస ప్రైజ్ మనీ కేటాయించబడింది. టోర్నీలో అత్యల్ప స్థానాల్లో ఉన్న జట్లు కూడా కనీసం రూ. 1 కోటి ( $125,000) పొందాయి. ఈ విధంగా ఐసీసీ ప్రతీ జట్టుకు ఒక నిర్దిష్ట మొత్తం అందజేస్తోంది. ఛాంపియన్స్ ట్రోఫీ ఎనిమిదేళ్ల విరామం తర్వాత తిరిగి రావడంతో ఈసారి భారీ ప్రైజ్ మనీని ప్రకటించడం విశేషం.
భారత జట్టు ఈ విజయంతో మరోసారి ప్రపంచ క్రికెట్లో తన స్థాయిని నిరూపించుకుంది. భారీ ప్రైజ్ మనీతో పాటు, ఈ ట్రోఫీ గెలిచినందుకు భారత ఆటగాళ్లు, బీసీసీఐ ప్రత్యేకంగా బోనస్ కూడా ప్రకటించే అవకాశం ఉంది. ఛాంపియన్స్ ట్రోఫీ 2025 విజయంతో భారత జట్టు ఐసీసీ ఈవెంట్లలో తన పటిష్టతను మరోసారి ప్రదర్శించింది.
