Megha Engineering: హైదరాబాద్ ప్రధాన కేంద్రంగా వివిధ రంగాల్లో సేవలందిస్తున్న మేఘా ఇంజనీరింగ్ అండ్ ఇన్‌ఫ్రాస్ట్రక్చర్ లిమిటెడ్ సంస్థ ఆస్తులపై అపర కుబేరుడు గౌతమ్ అదానీ కన్ను పడింది. మేఘా ఇంజనీరింగ్ గ్రూప్ కంపెనీ మేఘ పవర్ ట్రాన్స్‌మిషన్ వ్యాపార ఆస్తులను అదానీ గ్రూప్ కొనుగోలు చేసేందకు సిద్ధమైనట్లు సమాచారం. అదానీ గ్రూప్‌లోని అదానీ ఎనర్జీ సొల్యూషన్స్ లిమిటెడ్ ( Adani Enargy Solutions Ltd ) ఈ విషయమై మేఘా ఇంజనీరింగ్ గ్రూప్‌తో సంప్రదింపులు సాగిస్తున్నట్లు సమాచారం.
పవర్ ట్రాన్స్‌మిషన్ వ్యాపార ఆస్తుల కొనుగోలు విషయంలో ఇరు పక్షాలు ఒక ఒప్పందానికి వస్తే ఉత్తర్ ప్రదేశ్‌లోని వెస్ట్రన్ యూపీ పవర్ ట్రాన్స్‌మిషన్ కంపెనీ లిమిటెడ్ (WUPPTCL) సంస్థ యజమాని మారనున్నాడు. ప్రస్తుతం మేఘా ఇంజనీరింగ్ గ్రూప్ చేతిలో ఉన్న ఈ కంపెనీ అదానీ ఎనర్జీ సొల్యూషన్స్ వెళ్లనుంది. ప్రస్తుతం వెస్ట్రన్ యూపీ పవర్ ట్రాన్స్‌మిషన్ సంస్థ విలువ రూ.6000 నుంచి రూ.7 వేల కోట్ల వరకు ఉంటుందని అంచనా. ఈ కంపెనీకి యూపీలోని 4 రాష్ట్ర ప్రభుత్వ పవర్ డిస్ట్రిబ్యూషన్ కంపెనీలతో దీర్ఘకాల పవర్ ట్రాన్స్‌మిషన్ సర్వీస్ ఒప్పందం కలిగి ఉంది.
వెస్ట్రన్ యూపీ పవర్ ట్రాన్స్‌మిషన్ కంపెనీ పరిధిలో 7 సబ్ స్టేషన్లు, 12 ట్రాన్స్‌మిషన్ లైన్లు ఉన్నాయి. 13,220 ఎంవీఏ విద్యుత్తును సరఫరా చేయగల సామర్థ్యాన్ని ఈ సంస్థ కలిగి ఉంది. మరోవైపు.. గత కొంత కాలంగా చూసుకుంటే అదానీ ఎనర్జీ సొల్యూషన్స్ కంపెనీ విద్యుత్తు ట్రాన్స్‌మిషన్ విభాగంలో వేగంగా విస్తరిస్తున్న సంగతి తెలిసిందే. ఈ క్రమంలోనే ఆ రంగంలో సేవలందిస్తున్న పలు సంస్థలను కొనుగోలు చేయడం లేదా భాగస్వామ్య ఒప్పందలు చేసుకోవడంపై అదానీ ఎనర్జీ సొల్యూషన్స్ దృష్టి సారించినట్లు అర్థమవుతోంది. అందుకే మేఘా ఇంజనీరంగ్ సంస్థతో చర్చలు జరుపుతున్నట్లు సమాచారం అయితే, ఆస్తుల కొనుగోలుపై రెండు కంపెనీల నుంచి ఎలాంటి అధికారిక ప్రకటన రాలేదు.
మేఘా ఇంజనీరింగ్ వ్యవస్థాపకులు పి.పిచ్చిరెడ్డి, ఆయన మేనల్లుడు పివి కృష్ణారెడ్డి మధ్య వాటాలు మార్చుకునే ప్రయత్నాల్లో భాగంగా ఆస్తుల అమ్మకం తెరపైకి వచ్చినట్లు తెలుస్తోంది. ఈ క్రమంలోనే కొన్ని ఆస్తులను విక్రయించే ప్రక్రియ మొదలైందని సమాచారం. పీవీ రెడ్డికి మేఘాలో 51 శాతం వాటాలు ఉన్నాయి. వాటి విలువ రూ. 15 వేల కోట్ల వరకు ఉంటుందని అంచనా. ఆస్తుల విక్రయం చేపట్టి యాజమాన్య బదిలీ ప్రక్రియను 2027 మార్చి నాటికి పూర్తి చేయాలని మేఘా ఫ్యామిలి చూస్తున్నట్లు తెలుస్తోంది.
