ఆంధ్రప్రదేశ్‌లో వైఎస్సార్‌సీపీకి మరోసారి ఎదురుదెబ్బ తగిలింది.. మరో రెండు మున్సిపాలిటీలు చేజారిపోయాయి. విజయనగరం జిల్లా బొబ్బిలి మున్సిపాలిటీలో వైస్ ఛైర్మన్ గొలగాన రమాదేవిపై కౌన్సిలర్లు పెట్టిన అవిశ్వాసం నెగ్గింది. అలాగే ప్రకాశం జిల్లా మార్కాపురం మున్సిపల్ ఛైర్మన్ చిర్లంచర్ల బాలమురళీకృష్ణారావుపై కూడా అవిశ్వాసం నెగ్గింది. బొబ్బిలిలో మొత్తం 30 మంది కౌన్సిలర్లలో 22 మంది అవిశ్వాసానికి మద్దతు తెలిపారు. మార్కాపురంలో 35 మంది కౌన్సిల్‌ సభ్యుల్లో 19 మంది అవిశ్వాసానికి అనుకూలంగా ఓటు వేశారు. దీంతో ఇద్దరు ఛైర్మన్‌లు పదవులు కోల్పోయారు.
బొబ్బిలి మున్సిపాలిటీ వైస్ ఛైర్మన్ గొలగాన రమాదేవిపై అవిశ్వాసం జరిగింది. ఈ సమావేశానికి ఎమ్మెల్యే బేబినాయనతో సహా 22 మంది సభ్యులు హాజరయ్యారు. వైఎస్సార్‌సీపీకి చెందిన 10 మంది, టీడీపీకి చెందిన 10 మంది కౌన్సిలర్లు, స్వతంత్ర అభ్యర్థి వనజాక్షి రమాదేవికి వ్యతిరేకంగా ఓటు వేశారు. మొత్తం 30 మంది కౌన్సిలర్లలో 22 మంది మద్దతుతో అవిశ్వాసం నెగ్గినట్లు ఎన్నికల అధికారి ప్రకటించారు. అవిశ్వాసం నెగ్గడంతో మున్సిపల్ వైస్ ఛైర్మన్ పదవికి ఎన్నికల కమిషన్ ప్రకటన విడుదల చేయాల్సి ఉంది. అయితే గొలగాన రమాదేవిపై పెట్టిన అవిశ్వాసానికి అదే పార్టీకి చెందిన మున్సిపల్ వైస్ ఛైర్మన్ 2 చెలికాని మురళీకృష్ణారావు మద్దతు పలికి షాకిచ్చారు.. ఆయన మద్దతు తెలపడంతో అంతా ఆశ్చర్యపోయారు. అంతేకాదు కలెక్టర్‌కు ఇచ్చిన అవిశ్వాస నోటీసులో ఆయన సంతకం లేదు. ఇటీవల బొబ్బిలి మున్సిపల్ ఛైర్మన్ సావు వెంకట మురళీకృష్ణారావుపై కూడా అవిశ్వాసం పెట్టడంతో ఆయన పదవి కోల్పోయారు. వైఎస్సార్‌సీపీకి చెందిన 10 మంది కౌన్సిలర్లు టీడీపీకి మద్దతు పలకడంతో రాంబార్కి శరత్‌బాబు మున్సిపల్ ఛైర్మన్‌గా ఎన్నికయ్యారు.
ప్రకాశం జిల్లా మార్కాపురం మున్సిపల్ ఛైర్మన్ చిర్లంచర్ల బాలమురళీకృష్ణారావుపై కూడా అవిశ్వాసం నెగ్గింది. త్వరలోనే ఈ పదవి టీడీపీకి దక్కనుంది. మొత్తం 35 మంది కౌన్సిలర్లు ఉంటే.. వైఎస్సార్‌సీపీకి 30 స్థానాలు.. 5 స్థానాలు టీడీపీ గెలించింది. ఇటీవల మున్సిపల్ ఛైర్మన్ పనితీరు నచ్చక 12మంది వైఎస్సార్‌సీపీ సభ్యులు రెండు నెలల క్రితం టీడీపీలో చేరారు. అనంతరం 24 మంది కౌన్సిలర్లు కలెక్టర్‌ను కలిసి బాలమురళీకృష్ణారావుపై అవిశ్వాసం పెట్టమని కోరారు. ఈ మేరకు నోటీసు జారీ చేసి ప్రత్యేక సమావేశం నిర్వహించారు. ఈ సమావేశానికి 23 మంది కౌన్సిల్‌ సభ్యులతో పాటు ఎమ్మెల్యే కందుల నారాయణరెడ్డి హాజరయ్యారు.. అవిశ్వాస తీర్మానానికి అనుకూలంగా 19 మంది ఓటు వేశారు. మిగతా వారు తటస్థంగా ఉన్నారు. దీంతో ఛైర్మన్‌పై ప్రవేశపెట్టిన అవిశ్వాసం నెగ్గింది. ఈ పదవి టీడీపీ ఖాతాలోకి చేరనుంది. ఇటీవల రాష్ట్రవ్యాప్తంగా పలు కార్పొరేషన్లు, మున్సిపాలిటీలు వైఎస్సార్‌సీపీకి చేజారగా.. కూటమి ఖాతాలోకి వెళ్లిపోయాయి.
