Sunrisers Hyderabad కు ఐపీఎల్ 2026లో మరోసారి నిరాశే మిగిలింది. ఎలిమినేటర్ మ్యాచ్లో Rajasthan Royals చేతిలో 47 పరుగుల తేడాతో ఓటమిపాలైన SRH టోర్నీ నుంచి నిష్క్రమించింది. భారీ అంచనాలతో బరిలోకి దిగిన హైదరాబాద్ జట్టు కీలక మ్యాచ్లో తడబడటంతో అభిమానులు తీవ్ర నిరాశకు గురయ్యారు.
ముందుగా బ్యాటింగ్ చేసిన RR జట్టు 244 పరుగుల భారీ స్కోర్ నమోదు చేసింది. రాజస్థాన్ బ్యాటర్ల దూకుడుకు SRH బౌలర్లు సమాధానం చెప్పలేకపోయారు. ముఖ్యంగా యువ సంచలనం Vaibhav Suryavanshi తన విధ్వంసకర ఇన్నింగ్స్తో మ్యాచ్ను పూర్తిగా మలుపుతిప్పాడు. కేవలం 29 బంతుల్లోనే 97 పరుగులు చేసి SRH బౌలర్లపై విరుచుకుపడ్డాడు. సెంచరీకి కేవలం మూడు పరుగుల దూరంలో ఔట్ అయినా.. అతని ఇన్నింగ్స్ మ్యాచ్లో హైలైట్గా నిలిచింది.
244 పరుగుల భారీ లక్ష్యంతో ఛేదన ప్రారంభించిన SRHకి ఆరంభంలోనే గట్టి షాక్ తగిలింది. మొదటి ఓవర్ రెండో బంతికే ఓపెనర్ Abhishek Sharma ఔట్ కావడంతో జట్టు ఒత్తిడిలో పడింది. ఆ తర్వాత కూడా స్టార్ బ్యాటర్లు వరుసగా వికెట్లు కోల్పోవడంతో హైదరాబాద్ కోలుకోలేకపోయింది.
Ishan Kishan (33), Nitish Kumar Reddy (38), సలీల్ అరోరా (35) పోరాడినా విజయానికి చేరువ చేయలేకపోయారు. నితీశ్ కుమార్ రెడ్డి SRH తరఫున టాప్ స్కోరర్గా నిలిచాడు. చివరకు హైదరాబాద్ జట్టు 19.2 ఓవర్లలో 196 పరుగులకు ఆలౌట్ అయింది.
రాజస్థాన్ బౌలర్లలో Jofra Archer 3 వికెట్లు తీసి మ్యాచ్ను తమవైపు తిప్పాడు. జడేజా 2, బర్గర్ 2, సుశాంత్ 2 వికెట్లు తీసి SRH బ్యాటింగ్ లైనప్ను కుప్పకూల్చారు.
ఈ ఓటమితో SRH అభిమానుల కలలు మరోసారి చెదిరిపోయాయి. గత కొన్నేళ్లుగా బలమైన బ్యాటింగ్ లైనప్ ఉన్నప్పటికీ కీలక మ్యాచ్ల్లో మాత్రం జట్టు విఫలమవుతోందని అభిమానులు ఆవేదన వ్యక్తం చేస్తున్నారు.
మరోవైపు ఎలిమినేటర్లో ఘన విజయం సాధించిన Rajasthan Royals జట్టు ఇప్పుడు క్వాలిఫయర్-2లో Gujarat Titans తో తలపడనుంది. ఈ మ్యాచ్ శుక్రవారం జరగనుండగా, ఫైనల్కు చేరేది ఏ జట్టో అన్న ఆసక్తి అభిమానుల్లో నెలకొంది.
SRHకి ఈ సీజన్ మరోసారి నిరాశతో ముగిసినా.. యువ ఆటగాళ్ల ప్రదర్శన భవిష్యత్తుపై ఆశలు పెంచుతోంది. అయితే కీలక మ్యాచ్ల్లో ఒత్తిడిని తట్టుకునే సామర్థ్యం పెంచుకోవాల్సిన అవసరం ఉందని క్రికెట్ విశ్లేషకులు అభిప్రాయపడుతున్నారు.
IPL2026
