ఇటీవల కాలంలో ఘోర ప్రమాదాలకు కేరాఫ్ అడ్రస్ గా నిలుస్తోంది ఉమ్మడి కర్నూలు జిల్లా. ప్రైవేటు ట్రావెల్ బస్సు దగ్థం కావటం.. భారీ ఎత్తున ప్రాణాలు కోల్పోయిన దారుణ రోడ్డు ప్రమాదం తర్వాత మరికొన్ని ప్రమాదాలు చోటుచేసుకోవటం తెలిసిందే. ఈ తెల్లవారుజామున (శనివారం ఉదయం) ఎమ్మిగనూరు నియోజకవర్గ పరిధిలో ఘోర రోడ్డు ప్రమాదం చోటు చేసుకుంది. రెండుకార్లు ఢీ కొన్న ఈ ఘటనలో ఇద్దరు చిన్నారులతో సహా మొత్తం ఐదుగురు మరణించారు. మరోనలుగురు గాయపడ్డారు. చికిత్స కోసం వారిని ఆదోనికి తరలించారు. కర్ణాటకకు చెందిన ఒక కుటుంబం ప్రముఖ ఆధ్యాత్మిక కేంద్రమైన మంత్రాలయంలో శ్రీరాఘవేంద్ర స్వామి మఠం దర్శనం కోసం వెళుతున్నారు. బాధితులు కర్ణాటకలోని కోలార్ జిల్లాలోని చెందిన వారిగా చెబుతున్నారు. వేగంగా వెళుతున్న కార్లు ఢీ కొనటంతో ఈ ఘోర ప్రమాదం చోటు చేసుకున్నట్లుగా చెబుతున్నారు.
మృతుల్లో వెంకటేశప్ప.. ఆయన కుమార్తె మీనాక్షి (32).. అల్లుడు సతీశ్ (36).. మనవళ్లు రుత్విక్.. బన్నీగౌడ్ లుగా పోలీసులు గుర్తించారు. ప్రమాదానికి దారి తీసిన కారణాల్ని పోలీసులు విచారిస్తున్నారు. ఇదిలా ఉండగా బెంగళూరు నుంచి మంత్రాలయం వెళుతున్న కర్ణాటక బస్సు పత్తికొండ పరిధిలోని తుగ్గలి.. రాతన గ్రామాల మధ్య బోల్తా పడింది. ప్రమాదం జరిగిన సమయంలో బస్సులో 29 మంది ఉన్నట్లుగా చెబుతున్నారు. ఈ ప్రమాదంలో ఇద్దరు వ్యక్తులు స్వల్పంగా గాయపడ్డారు.
