ప్రపంచంలోనే అత్యంత భారీ బడ్జెట్ వెబ్ సిరీస్ ఇప్పుడు రూపొందుతోంది. ఈ సిరీస్ బడ్జెట్ ఏకంగా 420 కోట్ల డాలర్లు. అంటే మన కరెన్సీలో సుమారు రూ.36 వేల కోట్లు కావడం విశేషం. ప్రపంచ వ్యాప్తంగా పేరుగాంచిన హ్యారీ పోటర్ బుక్స్ ఆధారంగా ఈ సిరీస్ తెరకెక్కిస్తున్నారు. మొత్తంగా ఏడు సీజన్లు, ఒక్కో సీజన్లో ఆరు ఎపిసోడ్లు ఉండేలా భారీగా ప్లాన్ చేస్తున్నారు. అసలు ఒక్కో ఎపిసోడ్ కే 10 కోట్ల డాలర్లు అంటే సుమారు రూ.850 కోట్లు ఖర్చు చేస్తుండటం విశేషం.
జేకే రౌలింగ్ రాసిన ఒక్కో పుస్తకం ఆధారంగా ఒక్కో సీజన్ తెరకెక్కించడానికి ఏర్పాట్లు చేస్తున్నారు. వచ్చే ఏడాది తొలి సీజన్ వచ్చే అవకాశం ఉంది. ఇంత భారీ బడ్జెట్ తో ఇప్పుడీ సిరీస్ అత్యంత ఖరీదైన టీవీ షోగా నిలవనుంది. ఇప్పటి వరకూ ఈ రికార్డు ది లార్డ్ ఆఫ్ ద రింగ్స్: ది రింగ్స్ ఆఫ్ పవర్ పేరిట ఉంది. ఆ సిరీస్ ను సుమారు రూ.8500 కోట్లతో తెరకెక్కించారు. ఒక్కో ఎపిసోడ్ కు రూ.530 కోట్లు ఖర్చు చేశారు. అమెజాన్ ప్రైమ్ వీడియోలో ప్రస్తుతం ఇది స్ట్రీమింగ్ అవుతోంది.
ఈ హ్యారీ పోటర్ సిరీస్ కోసం మొత్తంగా ఓ నగరాన్నే నిర్మించబోతున్నారు. ఇదో మినీ సిటీ. దీనిని నిర్మించడానికే ఏకంగా 130 కోట్ల డాలర్లు అంటే సుమారు రూ.11 వేల కోట్లు ఖర్చు చేస్తుండటం విశేషం. హ్యారీ పోటర్ పుస్తకాల్లో ఉండే అన్ని ప్రముఖ లొకేషన్లను నిర్మిస్తున్నారు.
ఇప్పటికే హ్యారీ పోటర్ పుస్తకాలపై 8 సినిమాలు తెరకెక్కాయి. అయితే ఈ సిరీస్ మాత్రం మరింత లోతుగా వాటిని ప్రేక్షకుల ముందుకు తీసుకురానున్నట్లు చెబుతున్నారు. జేకే రౌలింగ్ మొత్తంగా ఏడు పుస్తకాలు రాసింది. అలా ఒక్కో పుస్తకాన్ని ఒక్కో సీజన్ గా తీసుకురాబోతున్నారు.
