కశ్మీర్లోని పహల్గామ్లో పర్యాటకులపై జరిగిన ఘోర ఉగ్రదాడి కేసులో ఊహించని వ్యక్తి కీలక సాక్షిగా మారాడు. హనీమూన్ జంటలు, పర్యాటకులకు అందమైన రీల్స్ చేస్తూ పేరుగాంచిన ఒక స్థానిక ఫోటోగ్రాఫర్, ఇప్పుడు జాతీయ దర్యాప్తు సంస్థ (ఎన్ఐఏ)కు అత్యంత ముఖ్యమైన ఆధారాలు అందించాడు. ఉగ్రవాదులు కాల్పులు ప్రారంభించగానే ప్రాణభయంతో పరుగెత్తి, సమీపంలోని ఓ చెట్టు ఎక్కిన ఆ ఫోటోగ్రాఫర్, అక్కడ నుంచే కింద జరుగుతున్న మారణహోమాన్ని తన కెమెరాలో బంధించాడు.
ఏప్రిల్ 22న పహల్గామ్ సమీపంలోని ప్రఖ్యాత పర్యాటక ప్రాంతమైన బైసరన్ మైదానంలో ఈ ఘోరం జరిగింది. సాధారణంగా కొత్త జంటలు, పర్యాటకులతో కళకళలాడే ఈ ప్రశాంత ప్రదేశంలో, ఆనంద క్షణాలను చిత్రీకరించే ఈ ఫోటోగ్రాఫర్.. అనుకోకుండా భయానక దృశ్యాలను రికార్డ్ చేయాల్సి వచ్చింది. ఉగ్రవాదులు కాల్పులు జరుపుతుండగా, అతను ధైర్యం చేసి చెట్టుపై నుంచి వీడియో తీశాడు. ప్రస్తుతం అతని భద్రత దృష్ట్యా వివరాలను గోప్యంగా ఉంచారు.ఈ ఫోటోగ్రాఫర్ తీసిన వీడియోలు ఎన్ఐఏ దర్యాప్తునకు అమూల్యమైనవిగా మారనున్నాయని అధికారులు భావిస్తున్నారు. దాడి జరిగిన తీరును పునర్నిర్మించడానికి, ఉగ్రవాదులను గుర్తించడానికి ఈ దృశ్యాలు సహాయపడతాయని భావిస్తున్నారు.
దర్యాప్తు ప్రాథమిక సమాచారం ప్రకారం, ఇద్దరు ఉగ్రవాదులు దుకాణాల వెనుక నుంచి హఠాత్తుగా బయటకు వచ్చి, కొందరు బాధితులను ‘కల్మా’ చదవమని ఆదేశించి, పాయింట్ బ్లాంక్ రేంజ్లో కాల్చి చంపారు. దీంతో పర్యాటకులు భయంతో పరుగులు తీశారు. అదే సమయంలో జిప్లైన్ ప్రాంతం నుంచి మరో ఇద్దరు ఉగ్రవాదులు కాల్పులు జరిపారు. మొత్తం నలుగురు ఉగ్రవాదులు (ముగ్గురు పాకిస్థానీయులు, ఒక స్థానికుడు ఆదిల్ థోకర్) ఈ దాడిలో పాల్గొన్నట్లు సమాచారం.
దాడికి ముందు ఈ ఉగ్రవాదుల బృందం సుమారు 22 గంటల పాటు అటవీ ప్రాంతంలో నడిచి, పహల్గామ్ లోయలోకి ప్రవేశించినట్లు విచారణలో వెల్లడైంది. ఉగ్రవాదులు ఏకే47 రైఫిళ్లు, ఎం4 కార్బైన్ వంటి అత్యాధునిక ఆయుధాలను ఉపయోగించినట్లు అధికారులు గుర్తించారు. దాడి అనంతరం ఘటనా స్థలం నుంచి ఉగ్రవాదులు రెండు మొబైల్ ఫోన్లను అపహరించుకుపోయినట్లు తెలిసింది. వీటిలో ఒకటి పర్యాటకుడికి చెందింది కాగా, మరొకటి స్థానికుడిదిగా గుర్తించారు. ఈ ఫోన్ల ఆధారంగా కూడా దర్యాప్తు కొనసాగుతోంది.ఎన్ఐఏ సేకరించిన వివిధ వీడియో ఫుటేజీలు, ఇతర ఆధారాల ద్వారా దాడికి సంబంధించిన పూర్తి వివరాలను రాబట్టేందుకు అధికారులు ప్రయత్నిస్తున్నారు.
