కదిరి మున్సిపాలిటీని ‘షేక్’ చేసేదెవరు?
అర్పియా భాను–అత్తార్ పర్వీన్ మధ్య ఆసక్తికర పోరు
కదిరి మున్సిపాలిటీ రాజకీయాలు చివరి నిమిషంలో ఆసక్తికర మలుపు తిరిగాయి. రోజుకో పేరు, రోజుకో సమీకరణంతో సాగిన చర్చలకు తెరదించుతూ తెలుగుదేశం పార్టీ నుంచి షేక్ అర్పియా భాను, వైఎస్సార్‌సీపీ నుంచి షేక్ అత్తార్ పర్వీన్ అభ్యర్థులుగా ముందుకొచ్చారు. ఇద్దరూ మైనారిటీ వర్గానికి చెందినవారే. అభ్యర్థుల వెనుక ఉన్న రాజకీయ అనుభవం, పార్టీ బలం, స్థానిక పరిచయాలు, అంతర్గత సమన్వయం ఈ ఎన్నికలో చర్చనీయాంశాలుగా మారాయి. అయితే ఈ అంశాల్లో ఏది ఓటర్లపై ఎంత ప్రభావం చూపుతుందో ఫలితాలే స్పష్టం చేయనున్నాయి.
అర్పియా భానుకు పార్టీ బలం.. సమన్వయం సవాలు
టీడీపీ అభ్యర్థి షేక్ అర్పియా భాను కుటుంబం ఎమ్మెల్యే కందికుంట వెంకట ప్రసాద్‌తో సన్నిహిత సంబంధాలు ఉన్నాయి. అర్పియా భాను భర్త కదిరి పట్టణం లో జువెలరీ దుకాణం నిర్వహిస్తున్నాడు. తెలుగు దేశం పార్టీ లో సభ్యులు. ఎమ్మెల్యే కందికుంట నాయకత్వంలో పార్టీ యంత్రాంగం ఎంత సమర్థంగా పనిచేస్తుంది? కూటమి భాగస్వామ్య పక్షాల మద్దతు క్షేత్రస్థాయిలో ఎంతవరకు సమీకృతమవుతుంది? అన్నవి పరిశీలించాల్సిన అంశాలు. టీడీపీకి అధికార కూటమి మద్దతు, స్థానిక నాయకత్వం, పార్టీ నిర్మాణం వంటి అంశాలు బలంగా ఉండే అవకాశం ఉంది. మరోవైపు అంతర్గత విభేదాలు లేదా సమన్వయ లోపాలు తలెత్తితే వాటిని పరిష్కరించడం నాయకత్వానికి కీలక బాధ్యతగా మారుతుంది. అర్పియా భాను ఆర్థికంగా కొంత బలమైన అభ్యర్థి.
అత్తార్ పర్వీన్‌కు చాంద్ బాషా అనుభవం
వైఎస్సార్‌సీపీ అభ్యర్థి షేక్ అత్తార్ పర్వీన్ మాజీ ఎమ్మెల్యే అత్తార్ చాంద్ బాషా సతీమణి. 2014లో వైఎస్సార్‌సీపీ తరపున కదిరి ఎమ్మెల్యేగా ఎన్నికైన చాంద్ బాషా అనంతరం కొద్ది కాలానికే పార్టీ ఫిరాయించి తెలుగుదేశం పార్టీలోకి చేరి విప్‌గా పనిచేశారు. 2019 ఎన్నికల్లో టీడీపీ టికెట్ ఆశించినప్పటికీ అవకాశం దక్కలేదు. ఆ ఎన్నికల్లో కందికుంట వెంకట ప్రసాద్‌కు టీడీపీ టికెట్ లభించగా, వైఎస్సార్‌సీపీ అభ్యర్థి పీవీ సిద్ధారెడ్డి విజయం సాధించారు. తరువాత చాంద్ బాషా తిరిగి వైఎస్సార్‌సీపీలో చేరారు.
2024 ఎన్నికల్లోనూ వైఎస్సార్‌సీపీ టికెట్ కోసం ప్రయత్నించినా అవకాశం దక్కలేదు. ఈ నేపథ్యంలో తన సతీమణికి మున్సిపల్ చైర్మన్ అభ్యర్థిగా అవకాశం లభించడం ఆయనకు స్థానిక రాజకీయాల్లో తన ప్రభావాన్ని చాటుకునే వేదికగా మారవచ్చని రాజకీయ పరిశీలకులు భావిస్తున్నారు.
ఎమ్మెల్యేగా పనిచేసిన అనుభవం, స్థానిక నాయకులు, కార్యకర్తలతో ఉన్న పరిచయాలు, రెండు ప్రధాన పార్టీల్లో పనిచేసిన నేపథ్యం చాంద్ బాషాకు ఉపయోగపడే అంశాలు. అయితే గతంలో ఉన్న పరిచయాలు ప్రస్తుత ఎన్నికలో ఓట్లుగా మారుతాయని ముందుగానే నిర్ధారించలేం. వైఎస్సార్‌సీపీ శ్రేణుల సమన్వయం, స్థానిక సమస్యలపై ప్రచారం, అభ్యర్థిపై ఓటర్ల అభిప్రాయం కూడా అంతే ప్రాధాన్యం కలిగి ఉంటాయి. ఆర్థికంగా తెలుగు దేశం అభ్యర్థి కన్నా బలమైన వర్గం. పార్టీ ఫిరాయింపు కొంత చర్చకు దారితీసింది.
కూటమి సమన్వయం.. వైసీపీ అంతర్గత ఐక్యత
టీడీపీ కూటమిలోని బీజేపీ, జనసేన నాయకులు, కార్యకర్తల మధ్య సమన్వయం ఎలా ఉంటుందన్నది ఎన్నికల పరిశీలనలో ఒక ముఖ్యమైన అంశం. వివిధ వర్గాల మధ్య విభేదాలున్నాయన్న చర్చలు వినిపిస్తున్నప్పటికీ, అవి ఓటింగ్‌పై ఎంత ప్రభావం చూపుతాయో ఇప్పుడే తేల్చలేం. కూటమి భాగస్వాములు సమన్వయంతో పనిచేస్తే టీడీపీకి ప్రయోజనం కలగవచ్చు. అదే సమయంలో స్థానికంగా అసంతృప్తి కొనసాగితే దాని ప్రభావాన్ని అంచనా వేయడం కష్టం.
వైఎస్సార్‌సీపీకి కూడా ఇదే సూత్రం వర్తిస్తుంది. అభ్యర్థి వెనుక ఉన్న నాయకుడి అనుభవం మాత్రమే సరిపోదు. పార్టీ శ్రేణులు ఏకతాటిపై పనిచేయడం, స్థానిక నాయకుల సహకారం, ఓటర్లతో ప్రత్యక్ష సంబంధాలు కీలకమవుతాయి. రెండు పార్టీల్లోనూ అంతర్గత విభేదాలు ఉన్నాయన్న చర్చల మధ్య, వాటిని ఏ పార్టీ ఎంతవరకు పరిష్కరించుకుంటుందన్నది గమనించాల్సిన అంశం.
వ్యక్తుల పోటీనా.. పార్టీల బలపరీక్షనా?
ఈ పోటీని ఇద్దరు మహిళా అభ్యర్థుల మధ్య పోరుగా మాత్రమే చూడలేం. స్థానికంగా పార్టీలు సంపాదించుకున్న పట్టు, నాయకుల రాజకీయ అనుభవం, కూటమి సమన్వయం, కార్యకర్తల చురుకుదనం, ఓటర్ల స్థానిక అవసరాలు ఇందులో భాగస్వాములవుతున్నాయి. అదే సమయంలో అభ్యర్థుల వ్యక్తిగత పరిచయాలు, ప్రజలతో సంబంధాలు, మున్సిపాలిటీ అభివృద్ధిపై వారి దృక్పథం కూడా చర్చకు రావాల్సిన అంశాలే.
అధికార కూటమి తన స్థానిక రాజకీయ బలాన్ని ఎలా వినియోగించుకుంటుంది? వైఎస్సార్‌సీపీ తన నాయకుల అనుభవాన్ని, క్షేత్రస్థాయి పరిచయాలను ఎంతవరకు ప్రజా మద్దతుగా మలుచుకుంటుంది? అన్న ప్రశ్నలకు ఓటర్ల తీర్పు సమాధానం ఇవ్వనుంది. కదిరి మున్సిపాలిటీని ‘షేక్’ చేసేదెవరో తెలుసుకోవాలంటే రాజకీయ వ్యూహాలతోపాటు ప్రజల ప్రాధాన్యాలను కూడా గమనించాలి. అంతిమంగా ఈ పోటీ వ్యక్తుల మధ్య ఆధిపత్య పోరుగా మిగులుతుందా, లేక పట్టణ రాజకీయాలపై విస్తృత ప్రభావం చూపుతుందా అన్నది ఫలితాల అనంతరం స్పష్టమవుతుంది.
KadiriMunicipality
నరసింహారెడ్డి చందమూరి
ఫ్రీలాన్స్ జర్నలిస్టు, కదిరి.
