సినిమాల పైరసీ కేసులో అరెస్ట్ అయిన ఐబొమ్మ వెబ్ సైట్ నిర్వాహకుడు రవి పోలీసుల కస్టడీ రెండో రోజు విచారణ పూర్తి చేసుకున్నాడు. పైరసీ నెట్ వర్క్ ను ఛేదించేందుకు మొదటి కేసులో ఐదు రోజుల పాటు రవి కస్టడీకి తీసుకున్న పోలీసులు, తాజాగా మరో మూడు రోజుల కస్టడీ మంజూరు కావడంతో మళ్లీ విచారణ చేపడుతున్నారు.
రెండో రోజు ఉదయం నుంచి ప్రశ్నలు ఎదుర్కొన్న రవి మొదట మౌనం వహించినప్పటికీ, మధ్యాహ్నం నుంచి కొన్ని కీలక విషయాలు వెల్లడించినట్లు సమాచారం. పైరసీలో ఉన్న గుట్టు బయటపడినా, తన వద్ద ఉన్న విదేశీ పౌరసత్వం సహాయపడుతుందని, అలా తాను తప్పించుకోవచ్చని భావించానని విచారణ చేసిన అధికారులకు చెప్పినట్లు తెలుస్తోంది.
తన నెట్‌వర్క్‌ను ఎవరూ గుర్తించలేరనే నమ్మకంతో పనిచేశానని, అదే ధీమా కారణంగా విదేశీ ఏజెంట్లు, దేశీయ ఉద్యోగుల ద్వారా ఐబొమ్మను మరింత బలపర్చినట్లు చెప్పినట్లు సమాచారం. తన కార్యకలాపాలు మొదట్లో చిన్న వ్యాపారంగా ప్రారంభమైనప్పటికీ, తర్వాత అది ఎంత పెద్ద నేరమో, పరిశ్రమకు ఎంత నష్టం కలిగిస్తుందో అర్థం కాలేదని చెప్పాడట.
సినిమాలను అక్రమంగా అప్లోడ్ చేయడం, వాటి ద్వారా లాభాలు పొందడం తప్పని తెలుసుకోవడం ఆలస్యమైందని అన్నాడని సమాచారం. కానీ విచారణలో ఇప్పుడు తీవ్ర పశ్చాత్తాపం వ్యక్తం చేస్తున్నాడని తెలుస్తోంది. పైరసీ వల్ల నిర్మాతలు, పంపిణీదారులు, థియేటర్ యజమానులు ఎదుర్కొంటున్న నష్టాలపై పోలీసులు ప్రశ్నించినప్పుడు రవి కొంత ఆలోచించాడని సమాచారం.
ఇకపై పైరసీ అడుగుపెట్టనని, ఇలాంటి కార్యకలాపాలకు పూర్తిగా దూరంగా ఉంటానని, జైలు నుంచి బయటకు వచ్చిన తర్వాత సరికొత్త జీవితాన్ని ప్రారంభించాలని కోరుకున్నట్లు తెలిసింది. అయితే రవికి సహకరించిన విదేశీ ఏజెంట్ల వివరాలు, వారి లొకేషన్లు, నిధుల ప్రవాహం, వేదికలు మారుస్తూ పైరసీ ఫైళ్లు అప్లోడ్ చేసిన విధానం, లాభాల పంపిణీపై పోలీసులు సమగ్రంగా పరిశీలిస్తున్నారు.
రవితో పని చేసిన ఉద్యోగుల జాబితా, వారి పాత్రలపై వివరాలు తెలుసుకుంటున్నారు. ప్రత్యేకంగా డొమైన్ మార్పులు, సర్వర్ లొకేషన్లు, క్లౌడ్ నెట్ వర్క్ తో రవి ఎలా పైరసీ ఫైల్స్‌ ను దాచిపెట్టాడో అధికారులు సైబర్ ఫోరెన్సిక్ సాయంతో విచారిస్తున్నారు. కస్టడీ కొనసాగుతున్న నేపథ్యంలో రవి ఇచ్చే సమాచారం ఆధారంగా మరిన్ని అరెస్టులు జరిగే అవకాశం ఉన్నట్లు తెలుస్తోంది. ఏదేమైనా రవి పశ్చాత్తాపం వ్యక్తం చేసినా, కేసు తీవ్రత దృష్టిలో పెట్టుకుని పోలీసులు విచారణ మరింత కఠినతరం చేస్తున్నారు.
