సంక్రాంతి పండుగ వేళ పట్టణాల నుంచి పల్లెలకు వెళ్లే జనంతో రహదారులు కిక్కిరిసిపోయాయి. ఉద్యోగాలు, చదువుల కారణంగా పట్నాల్లో స్థిరపడిన ప్రజలు కుటుంబ సమేతంగా స్వగ్రామాలకు బయలుదేరడంతో వాహన రద్దీ ఒక్కసారిగా పెరిగింది. ముఖ్యంగా తెలంగాణలోని కీలక జాతీయ రహదారులపై ట్రాఫిక్ తీవ్ర స్థాయికి చేరింది.
చౌటుప్పల్ మండలంలోని పంతంగి టోల్ ప్లాజా వద్ద వాహనాలు కిలోమీటర్ల కొద్దీ బారులు తీరాయి. కార్లు, బస్సులు, లారీలతో పాటు ద్విచక్ర వాహనాలు కూడా టోల్ గేట్ దాటేందుకు గంటల తరబడి ఎదురుచూడాల్సిన పరిస్థితి ఏర్పడింది. ఇదే తరహా పరిస్థితి కేతేపల్లి మండలం కొర్లపహాడ్ టోల్ గేట్ వద్ద కూడా కనిపించింది. అక్కడ కూడా వాహనాల క్యూలు అంతం కనిపించని విధంగా ఉన్నాయి.
ఇటు హైదరాబాద్ – విజయవాడ జాతీయ రహదారిపై భారీగా ట్రాఫిక్ పెరిగింది. సంక్రాంతి సెలవులు కావడంతో ఒకేసారి ఎక్కువ మంది ప్రయాణాలు చేయడంతో రహదారి మొత్తం వాహనాలతో నిండిపోయింది. టోల్ గేట్లను దాటేందుకు కనీసం రెండు గంటల సమయం పడుతుండటంతో ప్రయాణికులు తీవ్ర అసహనానికి గురవుతున్నారు.
ట్రాఫిక్ను సాఫీగా నిర్వహించేందుకు టోల్ సిబ్బంది, ట్రాఫిక్ పోలీసులు ప్రయత్నిస్తున్నప్పటికీ, వాహనాల సంఖ్య ఎక్కువగా ఉండటంతో పూర్తిస్థాయిలో క్లియర్ చేయలేకపోతున్నారు. కొన్ని చోట్ల అదనపు సిబ్బందిని మోహరించినా పరిస్థితి మాత్రం అంతగా మారలేదు. దీంతో చిన్నపిల్లలు, వృద్ధులు ఉన్న కుటుంబాలు రోడ్డుపైనే ఇబ్బందులు పడుతున్నాయి.
అధికారులు ప్రయాణికులు ఓపికగా వ్యవహరించాలని, సాధ్యమైనంత వరకు ప్రత్యామ్నాయ మార్గాలను వినియోగించాలని సూచిస్తున్నారు. మరోవైపు పండుగ సీజన్ ముగిసే వరకు ఇదే పరిస్థితి కొనసాగే అవకాశముందని అంచనా వేస్తున్నారు.
SankrantiTraffic
