తెలంగాణ రాజకీయాల్లో చర్చనీయాంశంగా మారిన కొండా సురేఖ వివాదం ఇప్పుడు సర్దుమణిగినట్లు తెలుస్తోంది. గత కొన్ని వారాలుగా దేవాదాయ శాఖ మంత్రి కొండా సురేఖ, రెవిన్యూ శాఖ మంత్రి పొంగులేటి శ్రీనివాస్ రెడ్డి మధ్య నెలకొన్న విభేదాలు కాంగ్రెస్ ప్రభుత్వానికి తలనొప్పిగా మారిన విషయం తెలిసిందే. అయితే దీపావళి రోజున జరిగిన పరిణామాలు ఆ విభేదాలకు తెరదించాయని తెలుస్తోంది.
ఇటీవలి కాలంలో కొండా సురేఖ ప్రైవేట్ ఓఎస్డీ సుమంత్‌పై ప్రభుత్వం చర్యలు తీసుకోవడం, సిమెంట్ ఫ్యాక్టరీ ఫిర్యాదు మేరకు కేసు నమోదు కావడం, పోలీసుల చర్యలను సురేఖ కుమార్తె సుస్మిత ప్రతిఘటించడం వంటి సంఘటనలు పెద్ద వివాదంగా మారాయి. ఈ వ్యవహారంపై మీడియా విస్తృతంగా ప్రసారం చేయడంతో అధికార కాంగ్రెస్ పార్టీపై ప్రతిపక్షం తీవ్ర విమర్శలు చేసింది.
అంతేకాకుండా మేడారం అభివృద్ధి పనుల్లో మరో మంత్రి జోక్యం చేసుకున్నారని, దేవాదాయ శాఖ మంత్రి సురేఖకు సమాచారం ఇవ్వలేదని ఆరోపణలు రావడంతో సురేఖ ఆ పనుల సమీక్షా సమావేశానికి, మంత్రివర్గ సమావేశానికీ హాజరుకాలేదు. దీనితో ఆమె మంత్రి పదవి పోతుందనే ప్రచారం ఊపందుకుంది.
ఈ సమయంలోనే భట్టి విక్రమార్క, మీనాక్షి నటరాజన్ కొండా సురేఖ, సుస్మితలను కలసి చర్చలు జరిపారు. వెంటనే కొండా దంపతులు — కొండా మురళి, సురేఖ.. జూబ్లీహిల్స్‌లో ముఖ్యమంత్రి రేవంత్ రెడ్డి నివాసానికి వెళ్లి భేటీ అయ్యారు. ఈ సమావేశానికి డిప్యూటీ సీఎం భట్టి విక్రమార్క, పీసీసీ అధ్యక్షుడు కూడా హాజరైనట్లు సమాచారం.
గతంలో ముఖ్యమంత్రిపై విమర్శలు చేసిన కొండా మురళి కూడా ఇటీవల తన మాటతీరు మార్చారు. ముఖ్యమంత్రి రేవంత్ రెడ్డి తనకు ఎమ్మెల్సీ హామీ ఇచ్చారని, ఆయనపై త‌న‌కున్న నమ్మకం దృఢమని చెప్పడం, పార్టీ లోపల సానుకూల వాతావరణం నెలకొన్న సంకేతంగా భావిస్తున్నారు.
జూబ్లీహిల్స్ ఉపఎన్నికల ముందు ఈ రాజీ రాజకీయాలకు ప్రత్యేక ప్రాధాన్యం లభించింది. అధికార పార్టీపై పెరుగుతున్న ఒత్తిడిని దృష్టిలో ఉంచుకుని, పార్టీ అగ్రనేతలు నష్టనివారణ చర్యగా కొండా దంపతులతో చర్చలు జరిపినట్లు సమాచారం. ఫలితంగా దీపావళి రోజున సీఎం రేవంత్‌తో కొండా దంపతులు కలసి చర్చలు జరిపి వివాదానికి ముగింపు పలికినట్లు తెలుస్తోంది.
ఈ పరిణామంతో తెలంగాణ రాజకీయాల్లో ఒక పెద్ద విభేదానికి తెరపడినట్టే కనిపిస్తోంది. ఇప్పుడు సురేఖ మళ్లీ ప్రభుత్వ, పార్టీ కార్యకలాపాల్లో చురుకుగా పాల్గొనే అవకాశాలు ఎక్కువగా ఉన్నాయని రాజకీయ వర్గాలు చెబుతున్నాయి.
మొత్తానికి, దీపావళి కాంతుల మధ్య సీఎం రేవంత్–కొండా దంపతుల మధ్య వెలసిన ఈ రాజీ తెలంగాణ కాంగ్రెస్‌కు “దీపావళి బహుమతి”గా మారిందనే మాట వినిపిస్తోంది.
