బాలీవుడ్ ప్రముఖులు, క్రికెట్ స్టార్‌లకు హెయిర్‌కట్ చేసే సెలబ్రిటీ హెయిర్‌డ్రస్సర్ ఆలిమ్ హకీం తన ఛార్జీల గురించి ఇటీవల వెల్లడించిన వివరాలు సోషల్ మీడియాలో వైరల్ అవుతున్నాయి. ప్రముఖుల హెయిర్‌కట్‌కు ఆయన ఎంత వసూలు చేస్తారన్న విషయం తెలిసి చాలామంది ఆశ్చర్యపోతున్నారు.
ఆలిమ్ హకీం ఇంటర్వ్యూలో వెల్లడించిన వివరాల ప్రకారం.. విరాట్ కోహ్లీ, రణ్‌బీర్ కపూర్, హార్దిక్ పాండ్యా, ఎం.ఎస్. ధోనీ, రణ్‌వీర్ సింగ్ వంటి స్టార్‌లకు హెయిర్‌కట్ చేయాలంటే ఆయన ఒక సెషన్‌కి కనీసం రూ. 1 లక్ష ఛార్జ్ చేస్తారు. దీనికి జీఎస్టీ కూడా కలిపితే మొత్తం రూ. 1,18,000 అవుతుంది. “వారు సినిమాల ద్వారా సంపాదిస్తుంటే, నేను నా సేవలకు ధర తీసుకోవడం సమంజసమే. ఇది నా కన్సల్టేషన్ ఫీజు,” అని ఆలిమ్ హకీం స్పష్టం చేశారు.
ఒక సినిమా కోసం 10 నుంచి 15 సెషన్లు అవసరమైతే ఆ ఖర్చు రూ. 10 లక్షల నుంచి రూ. 15 లక్షల వరకు ఉంటుందని ఆయన తెలిపారు. “ఇది టాక్సీలో మీటర్ వేసినట్లుగా ఉంటుంది. నేను ఎవరినీ బలవంతం చేయను. కానీ, వారు తెరపై చూసే ఫలితాలు ఆ విలువకు తగినవే అవుతాయి” అని ఆయన వివరించారు.
అయితే, ఈ లక్ష రూపాయల ఛార్జ్ ఆయన వ్యక్తిగతంగా చేసే హెయిర్‌కట్‌లకు మాత్రమే వర్తిస్తుంది. ఆలిమ్ హకీంకు చెందిన సెలూన్లలో ధరలు చాలా తక్కువని, సాధారణ ప్రజలకు అవి అందుబాటులో ఉంటాయని ఆయన చెప్పారు. “నా సెలూన్లలో ధరలు రూ. 2,500 నుండి మొదలవుతాయి. ప్రతీ క్లయింట్‌కి నేను స్వయంగా చేయలేను. మనీష్ మల్హోత్రా కూడా ప్రతి కస్టమర్‌కి డిజైన్ చేయరు కదా!” అని ఆయన అన్నారు.
విరాట్ కోహ్లీకి ఆలిమ్ చేసిన “ఫేడ్ కట్” లుక్ ఎంతో వైరల్ అయింది. అలాగే రణ్‌బీర్ కపూర్ “యానిమల్” సినిమా లుక్, ధోనీ, రణ్‌వీర్ సింగ్ లాంటి స్టార్స్ కోసం ఆయన చేసిన స్టైల్స్ కూడా చాలా ప్రజాదరణ పొందాయి. ఈ ఛార్జీలు సాధారణ ప్రజలకు అందుబాటులో లేనప్పటికీ, సెలబ్రిటీలకు వారి ప్రతిష్ట, కెమెరా ముందు వారి లుక్స్ చాలా ముఖ్యం. అందుకోసమే వారు ఇంత ఖర్చు చేయడానికి వెనుకాడరు. తెరపై మెరిపించే అందం వెనుక ఇలాంటి కళాకారుల కృషి, అందుకు తగ్గ భారీ ఖర్చు ఉంటుంది.
