Bengaluru నగరంలో భారీ వర్షాలు తీవ్ర విషాదాన్ని మిగిల్చాయి. ప్రముఖ షాపింగ్ ప్రాంతమైన Commercial Streetలో పాత ప్రహరీ గోడ ఒక్కసారిగా కూలిపోవడంతో ఏడుగురు ప్రాణాలు కోల్పోయిన దారుణ ఘటన చోటుచేసుకుంది. ఈ ప్రమాదం నగర ప్రజలను షాక్కు గురిచేసింది.బుధవారం రాత్రి కురిసిన భారీ వర్షాల కారణంగా ఈ ఘటన జరిగింది. సమాచారం ప్రకారం, వందేళ్లకు పైగా పాతదైన ప్రహరీ గోడ వర్షపు నీటితో బలహీనపడి అకస్మాత్తుగా కూలిపోయింది. ఆ సమయంలో గోడ పక్కనే ఉన్న పలువురు దాని కింద చిక్కుకున్నారు. మృతుల్లో ఇద్దరు కేరళకు చెందిన టూరిస్టులు, ఒక చిన్నారి, నలుగురు వీధి వ్యాపారులు ఉన్నట్లు అధికారులు తెలిపారు.
ఈ ఘటనపై కర్ణాటక ఉప ముఖ్యమంత్రి D. K. Shivakumar తీవ్ర దిగ్భ్రాంతి వ్యక్తం చేశారు. ప్రమాదం గురించి సమాచారం అందుకున్న వెంటనే ఆయన Bowring and Lady Curzon Hospitalకు వెళ్లి గాయపడిన వారిని పరామర్శించారు. వైద్యులతో మాట్లాడి వారి ఆరోగ్య పరిస్థితిని తెలుసుకున్నారు.ఈ సందర్భంగా శివకుమార్ మాట్లాడుతూ, కేరళ నుంచి సుమారు 56 మంది టూరిస్టులు బెంగళూరుకు పర్యటనకు వచ్చారని తెలిపారు. వారు కమర్షియల్ స్ట్రీట్లో షాపింగ్ చేస్తుండగా భారీ వర్షం ప్రారంభమైందని చెప్పారు. వర్షం నుంచి తప్పించుకోవడానికి కొందరు పాత గోడ కింద తలదాచుకోగా, అది ఒక్కసారిగా కూలిపోయిందని వివరించారు.
ఈ ప్రమాదంలో ఏడుగురు ప్రాణాలు కోల్పోవడం అత్యంత బాధాకరమని ఆయన ఆవేదన వ్యక్తం చేశారు. ఇప్పటికే ముఖ్యమంత్రి మృతుల కుటుంబాలకు పరిహారం ప్రకటించారని తెలిపారు. ఘటనపై పూర్తి స్థాయి విచారణకు ఆదేశాలు జారీ చేసినట్లు వెల్లడించారు.ఇక ఈ ఘటన నేపథ్యంలో నగరంలో భద్రతా చర్యలను కట్టుదిట్టం చేయాలని అధికారులకు ఆదేశాలు ఇచ్చారు. ముఖ్యంగా పాత నిర్మాణాలు, ప్రమాదకర గోడలు, చెట్లు వంటి వాటిపై ప్రత్యేక దృష్టి పెట్టాలని సూచించారు. భారీ వర్షాల కారణంగా నగరం వ్యాప్తంగా వందకు పైగా చెట్లు కూలిపోయినట్లు సమాచారం. ప్రమాదకరంగా ఉన్న చెట్ల కొమ్మలను వెంటనే తొలగించాలని అధికారులకు సూచించారు.
అలాగే సురక్షితం కాని ప్రాంతాల్లో వీధి వ్యాపారులను అనుమతించవద్దని స్పష్టం చేశారు. ఇలాంటి ఘటనలు మళ్లీ జరగకుండా కఠిన చర్యలు తీసుకుంటామని హామీ ఇచ్చారు. నగర ప్రజలు కూడా జాగ్రత్తగా ఉండాలని, భారీ వర్షాల సమయంలో పాత నిర్మాణాల దగ్గర ఉండకూడదని సూచించారు.ఈ ఘటన బెంగళూరులో వర్షాల తీవ్రత, నగర మౌలిక సదుపాయాల పరిస్థితిపై మరోసారి చర్చకు దారితీసింది. ప్రజల భద్రత కోసం అధికారులు తీసుకునే చర్యలు ఎంతవరకు ఫలిస్తాయో చూడాలి.
