బీజేపీ సీనియర్ నాయకుడు, మాజీ ఉపరాష్ట్రపతి ముప్పవరపు వెంకయ్యనాయుడు మరోసారి తన ప్రత్యేక శైలిలో సెటైర్లు వేసారు. తిరుపతిలో శనివారం జరిగిన ఓ కార్యక్రమంలో పాల్గొన్న ఆయన… ఇటు ఏపీ, అటు తెలంగాణ నేతలపై పదునైన విమర్శలు గుప్పించారు. తన ప్రసంగంలో ప్రాసలతో కూడిన వ్యాఖ్యలతో అక్కడున్న వారిని నవ్వించారు కానీ అందులోని అసలు బాణం మాత్రం సూటిగా ఉంది.
“అధికారం పోయిందని కొందరు అల్లాడుతున్నారు” అంటూ పరోక్షంగా వైఎస్సార్ కాంగ్రెస్ పార్టీ అధినేత జగన్పై ధ్వజమెత్తారు. అధికారం శాశ్వతం కాదని, ప్రజలు ఎలా తీర్పు ఇస్తారో ఎవ్వరికీ ముందే తెలియదని చెప్పారు. గతంలో తనకూ ఇలాగే అనుకోని ఫలితాలు వచ్చిన సందర్భాలు ఉన్నాయని వెల్లడించారు. తనకు మించిన పాలన ఎవ్వరూ ఇవ్వలేరన్న భావన కలిగిన వారిని ఆయన హెచ్చరించారు, అది అహంకారమేనన్నారు.
ప్రజలకు సేవ చేసే దృక్పథం ఉంటేనే నేతలు విజయవంతమవుతారని వెంకయ్య హితవు చెప్పారు. ఉచితాలు ఇచ్చి ప్రజలను మభ్యపెట్టే ప్రయత్నం ఎప్పటికీ ఫలించదని, మోదీ మాదిరిగా పని చేసి ప్రజల్లో నమ్మకాన్ని సంపాదించాలన్నారు. ప్రధాని నరేంద్ర మోదీ రాజకీయ జీవితం అందరికీ మార్గదర్శకమని అభిప్రాయపడ్డారు. అసలు పాలనకు ప్రజల మద్దతు కావాలంటే ఉచితాల కన్నా పనితీరు ముఖ్యమని స్పష్టం చేశారు.
జమిలి ఎన్నికలపై కూడా వెంకయ్య ఆసక్తికర వ్యాఖ్యలు చేశారు. ఒకేసారి దేశ, రాష్ట్రాల్లో ఎన్నికలు జరిగితే ఖజానాకు మేలు, ప్రజలకు సమయం ఆదా అవుతుందన్నారు. దీనిని కొన్ని రాజకీయ పార్టీలు వ్యతిరేక దృష్టితో చూస్తున్నాయని చెప్పారు. ప్రాంతీయ పార్టీలు భయపడాల్సిన అవసరం లేదని, ఇది ప్రజాస్వామ్యానికి మంచిదేనని వెంకయ్య నాయుడు నొక్కిచెప్పారు. తన స్టైల్లోనే సామెతలు, ప్రాసలు మిళితం చేసిన వెంకయ్య వ్యాఖ్యలు రాజకీయంగా ఆసక్తికరంగా మారాయి. ముఖ్యంగా అధికారానికి అండగా నిలిచిన వారి దృష్టికోణాన్ని మళ్లీ ప్రశ్నించారు. రాజకీయాల్లో మార్పులు సహజం అని, అధికారాన్ని దొరికినదిగా కాకుండా ప్రజలకు సేవ చేసే బాధ్యతగా భావించాలని నేతలకు సూచించారు.
