తెలంగాణ రాజకీయాల్లో డెక్కన్ సిమెంట్స్ వ్యవహారం మరోసారి పెద్ద చర్చనీయాంశమైంది. మంత్రి కొండా సురేఖ కూతురు సుస్మిత చేసిన సంచలన ఆరోపణలతో ఈ వివాదం కొత్త మలుపు తీసుకుంది. ముఖ్యంగా ఈ నేపథ్యంలో మంత్రి ఉత్తమ్ కుమార్ రెడ్డి చేసిన ప్రకటన రాజకీయ వర్గాల్లో హాట్ టాపిక్‌గా మారింది.
సూర్యాపేట జిల్లా పరిధిలోని సుమారు 73 ఎకరాల అటవీ భూమిని డెక్కన్ సిమెంట్స్ కంపెనీ అక్రమంగా ఆక్రమించిందనేది ప్రధాన ఆరోపణ. స్థానికుల ఫిర్యాదుల ఆధారంగా, నేషనల్ గ్రీన్ ట్రిబ్యునల్ (NGT) ఈ వివాదంపై ఇప్పటికే విచారణ చేపట్టి, ప్రభుత్వ శాఖల నుండి నివేదికలు కోరింది. ఈ కేసును కేంద్ర అటవీశాఖ సీరియస్‌గా తీసుకుంది. పది రోజుల క్రితం తెలంగాణ అటవీశాఖకు నోటీసులు పంపి, “ఆక్రమణలపై పూర్తి స్థాయి విచారణ జరిపి నివేదిక సమర్పించండి” అని ఆదేశించింది. దీనితో రాష్ట్ర అటవీశాఖ అధికారులు, ప్రత్యేక సర్వే బృందాలు ఆ ప్రాంతంలో పరిశీలనలు ప్రారంభించారు. ఈ భూమి అటవీ పరిధిలోనిదా? లేక ప్రైవేట్ సర్వే భూమా? అనే అంశాలపై పాత సర్వే రికార్డులు, మ్యాపులు, ఉపగ్రహ చిత్రాలను పరిశీలిస్తున్నారు. విచారణ నివేదిక వెలువడితేనే వాస్తవాలు బయటపడే అవకాశం ఉంది.
డెక్కన్ సిమెంట్స్ వివాదంలో తన ప్రమేయం ఉందంటూ వస్తున్న ఊహాగానాలపై మంత్రి ఉత్తమ్ కుమార్ రెడ్డి గట్టిగా స్పందించారు. “డెక్కన్ సిమెంటు వ్యవహారంతో నాకు ఏమాత్రం సంబంధం లేదు” అని ఆయన స్పష్టం చేశారు. తనపై వస్తున్న ఊహాగానాలను ఖండిస్తూ, “నా ప్రమేయం లేదని సురేఖ గారి కుమార్తె (సుస్మిత) కూడా స్పష్టంగా చెప్పింది కదా?” అని వ్యాఖ్యానించారు.
కొండా సురేఖ కుమార్తె చేసిన ఆరోపణలతో కాంగ్రెస్ పార్టీలో అంతర్గత అసంతృప్తులు బయటపడ్డాయి. ఈ సమయంలో తనపై ఎటువంటి మరక పడకుండా, వివాదం నుండి తొలగించుకోవాలనే ఉద్దేశం ఉత్తమ్ ప్రకటన వెనుక ఉన్నట్లు విశ్లేషకులు భావిస్తున్నారు. ఇప్పటికే కొండా సురేఖ – పొంగులేటి మధుసూదన్‌రెడ్డి మధ్య జరిగిన టెండర్ వివాదంతో కాంగ్రెస్ ఇబ్బందుల్లో ఉంది. ఈ కొత్త భూ వివాదం ప్రభుత్వానికి మరింత చెడ్డపేరు తెచ్చే అవకాశం ఉన్నందున, వెంటనే ఈ వివాదం నుండి దూరంగా ఉండటం ఉత్తమ్‌కు రాజకీయంగా శ్రేయస్కరమని భావించి ఉండవచ్చు.
డెక్కన్ సిమెంట్స్ కేసు కేవలం భూ వివాదమే కాదు, తెలంగాణ కాంగ్రెస్‌లో కలహాలు బయటపెట్టిన రాజకీయ పరిణామంగా మారింది. ఉత్తమ్ కుమార్ రెడ్డి ఇచ్చిన స్పష్టతతో తాత్కాలికంగా పరిస్థితి చల్లబడినప్పటికీ, కేంద్ర అటవీశాఖ నివేదిక వెలువడిన తర్వాతే ఈ వ్యవహారం యొక్క నిజమైన స్థితి.. రాజకీయ పర్యవసానాలు స్పష్టమవుతాయి.
