విపక్ష నాయకురాలిగా దేశ రాజకీయాల్లో తనదైన ముద్ర వేసిన తృణమూల్ కాంగ్రెస్ ఎంపీ మహువా మొయిత్రా వ్యక్తిగత జీవితం మరోసారి వార్తల్లో నిలిచింది. బిజూ జనతాదళ్‌కు చెందిన 65 ఏళ్ల మాజీ ఎంపీ పినాకి మిశ్రాతో ఆమె రహస్యంగా పెళ్లి చేసుకున్నట్టు సమాచారం. ఈ వివాహం గత నెల జర్మనీలో జరిగినట్టు తెలుస్తోంది. ఇప్పటివరకు ఈ విషయం గుట్టుచప్పుడు కాకుండా ఉంచినా, తాజాగా వెలుగులోకి వచ్చింది.
-వయస్సే కాదు.. కారణం రాజకీయ వైఖరే!
మహువా – పినాకి పెళ్లి వార్తకు ప్రధాన కారణం వారి మధ్య వయస్సు గ్యాప్ కాదని, ఇద్దరి రాజకీయ నేపథ్యం అని రాజకీయ వర్గాలు చెబుతున్నాయి. ఒకరు మోడీ ప్రభుత్వం మీద తాపత్రయంగా ధ్వజమెత్తిన ధీరనేత్రి అయితే, మరొకరు మాజీ కేంద్ర ప్రభుత్వాన్ని అనుసరించిన నేత. మహువా గతంలోనూ అనర్హతకు గురైన సందర్భాలు ఉండటంతో, ఈ వివాహం మరోసారి ఆమెను వార్తల్లోకి తెచ్చింది.
పినాకి మిశ్రా ఒడిశాలోని పూరీ నియోజకవర్గం నుంచి బిజూ జనతాదళ్ తరఫున పదవీ కాలం ముగిసే వరకూ ఎంపీగా సేవలందించారు. ఆయనకు ఇద్దరు పిల్లలు ఉన్నారు. ఇప్పుడంటే రాజకీయంగా చురుకుగా లేకపోయినా, బీజేపీకి అనుకూలంగా పనిచేసిన అభిప్రాయాలు గతంలో వ్యక్తమయ్యాయి.
-మలుపుల బాటలో మహువా జీవితం
మహువా మొయిత్రా జీవితాన్ని చూస్తే అనేక మలుపులు కనిపిస్తాయి. విదేశాల్లో విద్యనభ్యసించి, ప్రముఖ ఇన్వెస్ట్‌మెంట్ బ్యాంకర్‌గా పని చేశారు. మొదట డానిష్ ఫైనాన్షియర్ లార్స్ బ్రోర్సన్ను పెళ్లి చేసుకున్నారు. కానీ, ఆ సంబంధం విడాకులతో ముగిసింది. అనంతరం న్యాయవాది జై అనంత్తో సహజీవనం చేశారు. ఆ సంబంధం కూడా విఫలమైంది. అదే సమయంలో తనపై వచ్చిన కాష్ ఫర్ క్వశ్చన్స్ ఆరోపణలు పెద్ద దుమారం రేపాయి. అవే కారణంగా ఆమెపై లోక్‌సభ అనర్హత వేటు పడింది.
తాజా ఎన్నికల్లో మరోసారి ప్రజల మద్దతుతో ఎంపీగా గెలిచిన మహువా, గతంలో ఉన్నదాని కంటే చాలా కొంత తక్కువ మాటలతో, సాధారణంగా మౌనంగా కనిపిస్తున్నారు. ఆమె గత దూకుడు తగ్గిపోయిందనే విమర్శలు వచ్చాయి. ఇక పినాకి మిశ్రాతో పెళ్లి చేసుకోవడం ఆమె జీవితంలో మరో కీలక మలుపుగా మారింది. రాజకీయాల మధ్య వ్యక్తిగత జీవితాన్ని ఇలా మలచుకోవడం, పునర్నిర్మించుకోవడం ఆమె ధైర్యానికి నిదర్శనంగా చెబుతున్నారు కొందరు.
రాజకీయంగా ఎప్పుడూ వార్తల్లో ఉంటూ, బహిరంగంగా బీజేపీపై విమర్శలు గుప్పించే మహువా మొయిత్రా.. ఇప్పుడు వ్యక్తిగతంగా మరో ప్రయాణాన్ని ప్రారంభించారు. ఈ వివాహం ఆమె భవిష్యత్‌ రాజకీయాలకు ఏ మేరకు ప్రభావం చూపుతుందో వేచి చూడాలి.
