రాష్ట్ర ఐటీ శాఖ మంత్రి నారా లోకేష్ ప్రభావం ఇప్పుడు అంతర్జాతీయ స్థాయికి చేరిందా? అన్న ప్రశ్నకు సమాధానం “అవును” అని వినిపిస్తోంది. ఇప్పటి వరకు ఢిల్లీ రాజకీయాల్లో చురుగ్గా వ్యవహరించిన లోకేష్, ఇప్పుడు సింగపూర్, లండన్ వంటి అంతర్జాతీయ వేదికలపై తన ప్రస్థానం చాటుకుంటున్నారు. కొన్ని నెలల క్రితం నారా లోకేష్ సింగపూర్ పర్యటన ప్రత్యేక చర్చనీయాంశమైంది. ముఖ్యమంత్రి చంద్రబాబు లేదా ఇతర మంత్రులు లేకుండా, ఒక్కరే వెళ్లి పారిశ్రామికవేత్తలను కలుసుకోవడం, రోడ్‌షో నిర్వహించడం, పెట్టుబడులపై చర్చించడం – ఇవన్నీ ఆయన ప్రాధాన్యతను పెంచాయి. సాధారణంగా ఇలాంటి టూర్లలో సీఎంతో పాటు మంత్రులు వెళ్ళడం పరిపాటిగా ఉంటుంది. కానీ ఈసారి మాత్రం లోకేష్ ఒక్కడే ఈ బాధ్యతను తీసుకోవడం ఆయనకు లభిస్తున్న గుర్తింపునకు నిదర్శనం.
తాజాగా లండన్ పర్యటనలోనూ ఇదే దూకుడు కనిపించింది. అక్కడి పరిశ్రమకవేత్తలు, పెట్టుబడిదారులను కలుసుకోవడం, రోడ్‌షోలు నిర్వహించడం ద్వారా ఆంధ్రప్రదేశ్‌ను పెట్టుబడులకు అనువైన గమ్యస్థానంగా ప్రాజెక్ట్ చేశారు. ముఖ్యంగా ఇతర మంత్రులు లేకుండా, నారా లోకేష్ ఒక్కడే పాల్గొనడం ఆయనను ప్రత్యేకంగా నిలబెట్టింది. పార్టీ వర్గాల ప్రకారం ఇది యాదృచ్ఛికం కాదు, వ్యూహాత్మకంగానే తీసుకున్న అడుగు. అంతర్జాతీయ వేదికలకన్నా ముందు, జాతీయ స్థాయిలోనూ లోకేష్ ప్రాధాన్యం పెరిగింది. ప్రధానమంత్రి నరేంద్ర మోడీని మూడుసార్లు కలవడం, కేంద్ర మంత్రులతో తరచూ సంప్రదింపులు జరపడం, నేపాల్‌లో అల్లర్ల సమయంలో స్వయంగా రంగంలోకి దిగి తెలుగువారిని రక్షించేందుకు చర్యలు తీసుకోవడం – ఇవన్నీ ఆయనను కీలక నేతగా నిలబెట్టాయి. ముఖ్యంగా అమరావతిలో వార్ రూమ్ ఏర్పాటు చేసి రెండు రోజులపాటు అక్కడే మానిటరింగ్ చేయడం ఆయన చురుకుదనాన్ని స్పష్టం చేసింది.
గతంలో చంద్రబాబు నాయుడు అంతర్జాతీయ స్థాయిలో పెట్టుబడులను ఆకర్షించడానికి అనేక పర్యటనలు చేశారు. ఇప్పుడు అదే మార్గంలో లోకేష్ అడుగులు వేస్తున్నారు. తండ్రి వారసత్వాన్ని కొనసాగిస్తూ, తనకంటూ ప్రత్యేక గుర్తింపును తెచ్చుకోవాలని ప్రయత్నిస్తున్నారనేది స్పష్టమవుతోంది. మొత్తానికి, రాష్ట్రంలో, జాతీయ స్థాయిలో ఇప్పటికే పట్టు సాధించిన నారా లోకేష్, ఇప్పుడు అంతర్జాతీయ వేదికలపై కూడా దూకుడు చూపిస్తున్నారు. ఈ నెమ్మదిగా కానీ స్థిరంగా తీసుకుంటున్న అడుగులు ఆయన భవిష్యత్తు రాజకీయాల్లో మరింత పుంజుకునేలా చేస్తాయని పార్టీ వర్గాలు భావిస్తున్నాయి. రాజకీయ పర్యవేక్షకులు కూడా “లోకేష్ అంతర్జాతీయ స్థాయికి ఎగబాకడం అనేది టీడీపీ భవిష్యత్తుకు శుభసూచకమై ఉంటుంది” అని విశ్లేషిస్తున్నారు.
