ఆగ్రాకు చెందిన టీసీఎస్ మేనేజర్ మనవ్ శర్మ ఆత్మహత్య చేసుకుని 84 రోజులు గడిచాయి. ఆయన మరణానికి ముందు, ఫిబ్రవరి 24, 2025న రికార్డ్ చేసినట్లు భావిస్తున్న ఒక హృదయ విదారక వీడియో తాజాగా వెలుగులోకి వచ్చింది. ఈ వీడియోలో మనవ్ తన తీవ్రమైన ఒంటరితనాన్ని, పురుషులు సమాజంలో ఎదుర్కొంటున్న మానసిక సంఘర్షణలను ప్రస్తావించారు. తన తల్లిదండ్రులకు, సోదరికి క్షమాపణలు తెలుపుతూ, తాను వెళ్లిపోయాక అంతా సర్దుకుంటుందని ఆవేదన వ్యక్తం చేశారు. భార్య నికిత యొక్క వివాహేతర సంబంధాల గురించి తెలిసిన తర్వాత తాను తీవ్ర మానసిక క్షోభకు గురైనట్లు మనవ్ ఆవేదన చెందాడు. తన మృతికి ఎవరినీ బాధ్యులుగా పేర్కొనలేదు.
ఘటనపై దర్యాప్తు చేపట్టిన పోలీసులు 500 పేజీల చార్జిషీట్‌ను కోర్టులో దాఖలు చేశారు. పోలీసుల విచారణలో నికిత వివాహానికి ముందు ఇద్దరు వ్యక్తులతో సంబంధాలు కొనసాగించిందని, వివాహం తర్వాత కూడా ఈ సంబంధాలు కొనసాగాయని తేలింది. నికిత మాజీ ప్రియుడు అభిషేక్, మోహిత్ నర్వాణిని ఆమెకు పరిచయం చేయగా, మోహిత్‌తో నికితకు శారీరక సంబంధం ఉందని మోహిత్ స్వయంగా పోలీసులకు వెల్లడించినట్లు నివేదిక పేర్కొంది. వారి నిశ్చితార్థం వరకు ఈ సంబంధం కొనసాగినట్లు సమాచారం.
మనవ్ శర్మ, నికిత 2024 జనవరి 30న వివాహం చేసుకుని ముంబైలో తమ వైవాహిక జీవితాన్ని ప్రారంభించారు. తొలినాళ్లలో వారి మధ్య ఎటువంటి సమస్యలున్నట్లు కనిపించలేదు. అయితే, 2025 జనవరి 7న మనవ్‌కు ఇన్‌స్టాగ్రామ్ ద్వారా నికిత గత జీవితానికి సంబంధించిన కొన్ని సందేశాలు అందాయి. ఈ పరిణామం మనవ్‌ను మానసికంగా కుంగదీసింది. పరిస్థితిని చక్కదిద్దే ప్రయత్నంలో భాగంగా, మనవ్ నికిత ప్రియుడిగా చెప్పబడుతున్న మోహిత్ భార్యకు కూడా సందేశం పంపినట్లు తెలిసింది.
మనవ్ మరణానంతరం, నికిత తల్లి, సోదరిని పోలీసులు అరెస్ట్ చేశారు. అనంతరం, అహ్మదాబాద్‌లో పరారీలో ఉన్న నికిత , ఆమె తండ్రిని 2025 ఏప్రిల్ 4న పోలీసులు అదుపులోకి తీసుకున్నారు. ప్రస్తుతం నికితతో పాటు ఆమె కుటుంబ సభ్యులు జైలులో విచారణ ఎదుర్కొంటున్నారు. పరారీలో ఉన్న సమయంలో నికిత రెండు వీడియోలను విడుదల చేసింది. మొదటి వీడియోలో, తన గతం గురించి మనవ్‌కు చెప్పకపోవడం పొరపాటేనని, అది మోసం చేసినట్లేనని అంగీకరించింది. అయితే రెండవ వీడియోలో, మనవ్‌కు మద్యపానం అలవాటు ఉందని, గతంలో కూడా ఆత్మహత్యాయత్నం చేశాడని, ఈ విషయమై తాను చేసిన విన్నపాలను మనవ్ కుటుంబ సభ్యులు పట్టించుకోలేదని ఆరోపించింది.
ఈ విషాదకర సంఘటన సమాజంలో తీవ్ర కలకలం రేపింది. మానసిక ఆరోగ్యం, వైవాహిక సంబంధాలలో పారదర్శకత , విశ్వాసం ఆవశ్యకత, వ్యక్తిగత జీవితంలోని బాధలు మానసిక స్థితిని ఎంతలా ప్రభావితం చేస్తాయనే కీలక అంశాలను ఈ కేసు వెలుగులోకి తెచ్చింది. న్యాయ వ్యవస్థ దర్యాప్తు కొనసాగిస్తున్న నేపథ్యంలో బాధితులకు సత్వర న్యాయం జరగాలని సమాజం ఆశిస్తోంది.
