నేరారోపణలు ఎదుర్కొంటున్న నిందితులు పోలీసు విచారణను ఎదుర్కొనే వేళలో ఏం చేస్తారు? తాము చేసిన నేరాల్ని ఇట్టే ఒప్పేసుకుంటారా? పోలసీులు అడిగిన ప్రశ్నలకు స్పందించే తీరు ఎలా ఉంటుంది? అన్న ప్రశ్నలకు వచ్చే సాధారణ సమాధానాలకు భిన్నంగా వ్యవహరించిన పోలీసులను సర్ ప్రైజ్ చేశాడు ఐబొమ్మ నిర్వాహకుడు ఇమ్మడి రవి. సాధారణంగా సంచలన కేసుల్లో.. అందునా సాంకేతికత ఎక్కువగా ఉన్న అంశాలకు సంబంధించిన కేసుల్లో పోలీసులకు అర్థంకానట్లు చిత్రవిచిత్రంగా వ్యవహరిస్తుంటారు. కానీ.. ఐ బొమ్మనిర్వాహకుడు మాత్రం చాలా క్లారిటీగా.. క్లియర్ గా తాను చెప్పాల్సిన విషయాన్ని చెప్పటంతో పాటు.. తనది ఒంటరిజీవితమని.. తాను ఏక్ నిరంజన్ అంటూ చెప్పేసినట్లుగా తెలుస్తోంది.
ఐదు రోజుల పోలీసుల కస్టడీలో భాగంగా తొలిరోజున అతడ్ని విచారించిన పోలీసులకు తాను ఒంటరినని.. ‘మీ ఇష్టం వచ్చింది చేసుకోండి. నన్ను పట్టించుకునే వారు ఎవరూ లేరు. నేనెవరినీ మోసం చేయలేదు. సినిమాల్ని పైరసీ చేయలేదు. అక్రమంగా ప్రజల సొమ్మును దోచుకోలేదు’’ అని చెప్పినట్లుగా తెలుస్తోంది. అంతేకాదు.. పోలీసులు అడిగిన ప్రశ్నలకు చాలావరకు స్పష్టమైన సమాధానాలు చెప్పిన రవి.. కొన్ని ప్రశ్నలకు మాత్రం స్పందించలేదని చెబుతున్నారు.
టెక్నాలజీకి సంబంధించిన అంశాల్నిపోలీసులు అడిగినప్పుడు.. వారికి వివరంగా వివరించటమేకాదు.. విడుదలైన సినిమాను ఎలా డౌన్ లోడ్ చేసేది.. ఎలా హ్యాక్ చేసేది.. అనంతరం ఎలా అప్ లోడ్ చేసేది లాంటి వివరాల్ని వెల్లడించినట్లు తెలుస్తోంది. పోలీసు అధికారులకు పూర్తిగా సహకరించిన రవి.. నాకు తెలీదు.. చెప్పను లాంటి రోటీన్ డైలాగులకు దూరంగా ఉన్నట్లు సమాచారం.
ఐబొమ్మను ఎలా నిర్వాహిస్తారు? అందుకు వినియోగించే సాంకేతికత.. పిక్చర్ క్వాలిటీ పెంచేందుకు ఎలాంటి జాగ్రత్తలు తీసుకుంటారు? టెక్నికల్ సమస్యలు ఎదురైతే ఎలా అధిగమిస్తారు? లాంటిప్రశ్నలకు సమాధానాలు ఇచ్చినట్లు తెలుస్తోంది. ఇప్పటివరకు రవి 20 వేలకు పైగా సినిమాల్ని పైరసీ చేసినట్లుగా పోలీసులు భావిస్తున్నారు. విదేశాల్లోని సర్వర్లు.. వాటి నిర్వహణ ఇలాంటి ఎన్నో ప్రశ్నలకు అదరకుండా.. బెదరకుండా సమాధానాలు ఇచ్చినట్లుగా సమాచారం.
ఇదిలా ఉంటే.. అతడి తరఫు వాదనలు వినిపించేందుకు పలువురు న్యాయవాదులు ప్రయత్నించినా.. వారికి అందుబాటులోకి రవి రావట్లేదని తెలుస్తోంది. తన స్నేహితుడి సలహా ప్రకారం నిర్ణయం తీసుకుంటారని చెబుతున్నారు. సినిమా విడుదలకు ముందు క్యూబ్ ను ఎలా హ్యాక్ చేయొచ్చు? లాంటి అంశాలకు సైతం రవి సమాధానాలు ఇచ్చినట్లుగా తెలుస్తోంది. మొదటి రోజు కస్టడీకి తీసుకొని విచారణ చేపట్టినప్పటికీ.. ఎక్కువ భాగం టెక్నికల్ అంశాలే వచ్చాయని తెలుస్తోంది. మిగిలిన నాలుగు రోజుల విచారణలో మరిన్ని విషయాలు తెలిసే వీలుందని చెబుతున్నారు.
కొద్ది రోజులుగా తెలుగు రాష్ట్రాల్లో హాట్ టాపిక్ గా మారిన ఐబొమ్మ వెబ్ సైట్.. దాని నిర్వాహకుడు ఇమ్మడి రవి అరెస్టు.. రిమాండ్.. దీనికి సోషల్ మీడియాలోనూ.. వాట్సాప్ గ్రూపుల్లోనూ.. యూట్యూబ్ చానళ్లలో వస్తున్న రియాక్షన్ల గురించి ప్రత్యేకంగా చెప్పాల్సిన అవసరం లేదు. రవి అరెస్టుతో ఐబొమ్మకు బొమ్మ పడిందన్న మాట వినిపించటం.. అందుకు తగ్గట్లే.. తమ సేవల్ని శాశ్వితంగా నిలిపేస్తున్నట్లుగా పేర్కొంటూ ఐబొమ్మ వెబ్ సైట్ లో మెసేజ్ ప్రత్యక్షం కావటం తెలిసిందే.
అనూహ్యంగా ఐబొమ్మ వన్ పేరుతో ఐబొమ్మ తరహాలోనే తెలుగు సినిమాలు హెచ్ డీ ప్రింట్ తో స్ట్రీమ్ అవుతున్నట్లుగా ప్రచారం మొదలైంది. దీనికి తగ్గట్లే.. పలువురు వెబ్ సైట్ ఓపెన్ అవుతుందని.. సినిమాలు స్ట్రీమ్ అవుతున్నట్లుగా కొందరు సోషల్ మీడియాలో పోస్టులు పెడుతున్న పరిస్థితి. ఇదిలా ఉండగా.. దీనిపై సైబర్ క్రైమ్ పోలీసులు స్పందిస్తూ.. ఐబొమ్మ వన్ వెబ్ సైట్ ఓపెన్ కావటం లేదని క్లారిటీ ఇచ్చారు. దీనికి సంబంధించిన ఒక ప్రెస్ నోట్ ను విడుదల చేశారు.
‘‘ఐబొమ్మ వన్ వెబ్ సైట్ లో కొత్త సినిమాలు పైరసీ అయ్యాయన్న ప్రచారంలో వాస్తవం లేదు. అందులో మూవీస్ కు సంబంధించిన రివ్యూస్ మాత్రమే ఉన్నాయి. అది ఓపెన్ చేస్తే.. మూవీ రూల్జ్ కు రీడైరెక్టు అవ్వటం లేదు. ఐబొమ్మ.. బప్పం వెబ్ సైట్లను ఇప్పటికే బ్లాక్ చేయించాం. వేరే వెబ్ సైట్ల ద్వారా పైరసీకి పాల్పడితే.. అందుకు తగ్గట్లే చర్యలు తీసుకుంటాం’’ అంటూ సైబర్ క్రైం పోలీసులు వెల్లడించారు.
అయితే.. పోలీసుల ప్రకటనకు భిన్నంగా వాస్తవాలు ఉన్నట్లుగా చెబుతున్నారు. కొందరు ఐబొమ్మ వన్ వెబ్ సైట్ ను ఓపెన్ చేయటం.. అందులో పలు సినిమాలు దర్శనమిస్తున్నాయి. అందులో కొన్ని సినిమాలు ప్లే అవుతున్నట్లుగా సోషల్ మీడియాలో పోస్టులు పెడుతున్నారు. ఐబొమ్మ వన్ అన్నది మూవీ రివ్యూస్ వెబ్ సైట్ అని చెప్పటం కరెక్టు కాదని.. పోలీసులు సరిగా చెక్ చేయకుండానే ప్రకటన చేశారన్న విమర్శ వినిపిస్తోంది. అయితే.. సదరు వెబ్ సైట్ లో ఉన్న సినిమాలు మొత్తం ప్లే కాకున్నా.. కొన్ని మాత్రం అచ్చం ఐబొమ్మ వెబ్ సైట్ లో మాదిరే ప్లే అవుతున్నాయి. ఇదంతా చూస్తున్న వారు.. సైబర్ క్రైం పోలీసులు సైతం తప్పులో కాలేశారన్న మాట వినిపిస్తోంది. మరి.. ఈ వెబ్ సైట్ పై సైబర్ క్రైం పోలీసులు మరోసారి ప్రకటన విడుదల చేయొచ్చన్న మాట వినిపిస్తోంది. ఏం జరుగుతుందో చూడాలి.
