ప్రపంచ వ్యాప్తంగా ప్రస్తుతం గాజాలో శాంతి నెలకొల్పడం చర్చనీయాంశంగా మారింది. ఈజిప్టులో అమెరికా అధ్యక్షుడు డొనాల్డ్ ట్రంప్ అధ్యక్షతన జరిగిన కీలకమైన గాజా పీస్ సమ్మిట్‌కు భారత ప్రధాని నరేంద్ర మోదీకి ఆహ్వానం అందినా.. ఆయన వ్యక్తిగతంగా హాజరుకాకుండా, విదేశాంగ శాఖ సహాయ మంత్రి కీర్తి వర్ధన్ సింగ్‌ను పంపించడం ఇప్పుడు చర్చకు దారి తీస్తోంది.
నిజానికి అంతర్జాతీయ వేదికలపై తనను తాను ‘విశ్వగురు’గా, గ్లోబల్ లీడర్‌గా ప్రొజెక్ట్ చేసుకోవడానికి మోదీ ఎప్పుడూ వెనుకాడరు. ఫోటో-ఆప్స్‌కు, అంతర్జాతీయ దృష్టిని ఆకర్షించడానికి ఇదొక గొప్ప అవకాశం. కానీ ఈసారి మోదీ వెనక్కు తగ్గారు. దీనికి ప్రధాన కారణం ఒక్కటే డొనాల్డ్ ట్రంప్.
మోదీ, ట్రంప్‌ల మధ్య స్నేహం ఒకప్పుడు చాలా బలంగా ప్రదర్శించబడింది. అమెరికాలో జరిగిన “హౌడీ మోదీ”, ఇండియాలో జరిగిన “నమస్తే ట్రంప్” వంటి ఈవెంట్లు వారి వ్యక్తిగత అనుబంధానికి అద్దం పట్టాయి. మోదీ స్వయంగా అమెరికా భారతీయులను ట్రంప్‌కి ఓటు వేయమని పిలుపునిచ్చారు. కానీ ట్రంప్ రెండవ పదవీకాలం మొదలయ్యాక ఈ స్నేహం మాయమైంది. ట్రంప్ ప్రభుత్వం భారత్‌పై టారిఫ్‌లు విధించడం, H-1B వీసా నిబంధనలను కఠినతరం చేయడం, ఇంకా పాకిస్థాన్‌పై ఆపరేషన్లకు సంబంధించి స్వయంగా క్రెడిట్ తీసుకోవడం వంటి చర్యలు మోదీకి “గట్టి దెబ్బలు” అనిపించాయి. విపక్షాలు ఈ వైఫల్యాలను ఆయుధంగా మార్చుకున్నాయి. “56 అంగుళాల ఛాతీ” ఇమేజ్ అంతర్జాతీయ వేదికలపై కదిలిపోయింది.
ట్రంప్ విధానం ఎప్పుడూ ఒకే విధంగా ఉంది. కొంచెం పొగడ్తలతో పాటు కఠిన నిర్ణయాలు. “నా మిత్రుడు”, “ఇండియా అనివార్య భాగస్వామి” అంటూ మోదీని ప్రశంసిస్తూనే, మరో సందర్భంలో ఇండియాను “చీప్ ఎకానమీ” అని పిలవడం ట్రంప్ ద్వంద్వ వైఖరికి నిదర్శనం. ట్రంప్ వ్యూహం “ఒక చిన్న క్యారెట్, కానీ పెద్ద స్టిక్” స్వల్ప ప్రయోజనం చూపి, కఠినంగా వ్యవహరించడం అన్నట్లుగా ఉంది. మోదీ ఇప్పుడు దీనిని స్పష్టంగా అర్థం చేసుకున్నారని తెలుస్తోంది.
ఈ సదస్సుకు మోదీ వెళ్లి ఉంటే, దేశంలో మళ్లీ గ్లోబల్ లీడర్‌గా ప్రొజెక్ట్ అయ్యేవారు. కానీ తర్వాత ట్రంప్ గనుక మళ్లీ భారత్‌పై విమర్శలు చేసినా, లేదా కఠిన నిర్ణయాలు తీసుకున్నా, దేశీయ రాజకీయాల్లో విపక్షాలు మోదీని తీవ్రంగా విమర్శించేవి. “ట్రంప్ మీతో దోస్తీ చేసినా, దేశ ప్రయోజనాలను దెబ్బతీశాడు, మీరు ఏమీ చేయలేకపోయారు” అనే విమర్శ ఎదురయ్యేది. సదస్సులో ట్రంప్ మోదీని పేరుతో ప్రస్తావించకపోయినా, “ఇండియా ఒక గొప్ప దేశం, అక్కడ నాకు స్నేహితుడు ఉన్నాడు” అని చెప్పడం మోదీకి కొంత ఉపశమనం కలిగించింది. ఇటు స్నేహాన్ని నిలబెట్టుకుంటూనే, అటు భవిష్యత్తులో రాజకీయ విమర్శల నుండి తప్పుకునేందుకు మోదీ ఈ ‘జాగ్రత్త గేమ్’ ఆడుతున్నారని స్పష్టమవుతోంది. *నేర్చుకున్న పాఠం ట్రంప్ మోదీకి ఒక గొప్ప పాఠం నేర్పారు. అంతర్జాతీయ దౌత్యం ‘వ్యక్తిగత స్నేహాల’పై కాదు, వాస్తవతత్వంపై ఆధారపడి ఉంటుంది! ఈజిప్టు సమ్మిట్‌కు దూరంగా ఉండటం ద్వారా, మోదీ ఇప్పుడు వాస్తవతత్వానికి ప్రాధాన్యత ఇస్తున్నట్టు కనిపిస్తున్నారు.
