ఆంధ్రప్రదేశ్ రాష్ట్ర ప్రభుత్వం విశాఖపట్నంలోని రుషికొండ ప్యాలెస్‌లను సమర్థవంతంగా వినియోగించేందుకు చర్యలు చేపట్టింది. ఈ భవనాలను ఎలా ఉపయోగించాలనే దానిపై ప్రజల నుంచి సూచనలు, సలహాలు కోరుతూ పబ్లిక్ నోటీసు జారీ చేసింది. రాష్ట్ర పర్యాటక అభివృద్ధి శాఖ ఈ ఆహ్వానాన్ని వెబ్‌సైట్‌లో పొందుపరిచింది. పౌరులు తమ అభిప్రాయాలను [email protected] మెయిల్ ద్వారా పంపాలని ఏపీ టూరిజం అథారిటీ సీఈవో ఆమ్రపాలి తెలిపారు.
రుషికొండ ప్యాలెస్‌లను సాంస్కృతిక కేంద్రాలుగా, పర్యాటక ప్రమోషన్ కోసం, పబ్లిక్-ప్రైవేట్ భాగస్వామ్య విధానాల కోసం ఉపయోగించే అవకాశాలపై సలహాలు అందించాలని ప్రభుత్వం కోరింది.రుషికొండ పరిసర ప్రాంతాన్ని పర్యావరణ పర్యాటక కేంద్రంగా అభివృద్ధి చేసేందుకు సూచనలు కోరినట్లు పర్యాటక శాఖ తెలిపింది. ఈ నెలలో ఉదయం 11 గంటలకు విజయవాడ ఆటోనగర్‌లోని స్టాలిన్ కార్పొరేట్‌లో ఏపీ టూరిజం అథారిటీ కార్యాలయంలో జాతీయ, అంతర్జాతీయ స్థాయి సంస్థలతో సమావేశం ఏర్పాటు చేశారు.
ఈ సమావేశంలో ప్రముఖ ఆతిథ్య గ్రూపులు, సంస్థలు పాల్గొని రుషికొండ భవనాల వినియోగంపై ఆసక్తి వ్యక్తీకరణ (ఈవోఐ) చేయవచ్చని అథారిటీ పేర్కొంది. ఈ సమావేశం ద్వారా వచ్చే అభిప్రాయాలు రాష్ట్ర ఆర్థిక, సాంస్కృతిక అభివృద్ధికి దోహదపడతాయని అధికారులు ఆశిస్తున్నారు.పౌరులు, సంస్థలు అందించిన సూచనలను మంత్రుల బృందం సమీక్షిస్తుందని ఆమ్రపాలి తెలిపారు. ఈ సమీక్ష ఆధారంగా రుషికొండ ప్యాలెస్‌ల వినియోగంపై ప్రభుత్వం తుది నిర్ణయం తీసుకుంటుందని ఆమ్రపాలి స్పష్టం చేశారు.
ఈ ప్రక్రియ పారదర్శకంగా, ప్రజల సహకారంతో జరగాలని ప్రభుత్వం లక్ష్యంగా పెట్టుకుంది. రుషికొండ భవనాలను పర్యాటక, సాంస్కృతిక కేంద్రంగా మార్చడం ద్వారా రాష్ట్ర ఆదాయ వనరులను పెంచే అవకాశం ఉందని అధికారులు భావిస్తున్నారు. ఈ చర్యలు విశాఖ ప్రాంతాన్ని ఆర్థిక, సాంస్కృతిక హబ్‌గా మార్చడంలో కీలక పాత్ర పోషిస్తాయని విశ్లేషకులు అంచనా వేస్తున్నారు.రుషికొండ ప్యాలెస్‌ల వినియోగం రాష్ట్రంలో పర్యాటక రంగాన్ని బలోపేతం చేయడంతో పాటు స్థానిక ఆర్థిక వ్యవస్థను పరిపుష్టం చేస్తుందని ప్రభుత్వం ఆశిస్తోంది.
