ఇంటర్నెట్‌లో ప్రస్తుతం ఓ చైనా బిలియనీర్ జంట వివాహం గురించి చర్చ ఊపందుకుంది. వారి వ్యక్తిగత సంపద, నేపథ్యం చూసి ప్రపంచం ఆశ్చర్యపోతోంది. ముఖ్యంగా సోషల్ మీడియాలో “26 వేల కోట్లు సంపద కలిగిన యువతి ఒక చాయ్ వాలాతో పెళ్లి చేసుకుంటోంది” అనే కథనం వైరల్ కావడం, దానికి వచ్చిన స్పందనతో ఈ జంట వార్తల్లో నిలిచింది. అయితే ఈ ప్రచారం వెనుక ఉన్న అసలు నిజం ఆసక్తికరంగా ఉంది. ప్రజలు ‘చాయ్ వాలా’ అనుకుంటున్న ఆ వ్యక్తి, దేశంలోని అత్యంత ధనవంతుల జాబితాలో ఉన్న ఒక పెద్ద ప్రీమియం టీ కంపెనీకి యజమాని. చైనాలోని ఉన్నత వర్గాలకు చెందిన ఈ జంట ప్రేమకథ, వివాహం ఇప్పుడు అంతర్జాతీయ దృష్టిని ఆకర్షిస్తోంది.
ప్రపంచ ప్రసిద్ధి చెందిన ట్రినా సోలార్ వారసురాలైన గావో హైచున్ , , ప్రీమియం టీ బ్రాండ్ ‘చాగీ’ వ్యవస్థాపకుడు జాంగ్ జున్‌జీ త్వరలో పెళ్లి చేసుకోబోతున్నట్లు బ్లూమ్‌బర్గ్‌ నివేదిక ధృవీకరించింది. ఇద్దరూ 30 ఏళ్ల వయసులో ఉన్నారు. వీరి ప్రేమకథ ఒక వ్యాపార కార్యక్రమంలో పరిచయం కావడంతో మొదలైంది. ట్రినా సొలార్ కంపెనీ ప్రతినిధి వివాహ వార్తను ధృవీకరించినప్పటికీ తేదీలపై అధికారిక ప్రకటన ఇంకా వెలువడలేదు.
గావో హైచున్ ( కేథరిన్ హైచున్ గావో) ప్రపంచ ప్రఖ్యాతి గాంచిన సౌర ప్యానెల్ దిగ్గజం ట్రినా సోలార్ వ్యవస్థాపకుడు గావో జిఫాన్ కుమార్తె. ఆమెకు బిలియన్ల విలువైన వ్యాపార సామ్రాజ్యం వారసత్వంగా దక్కనుంది. ఆమె బ్రౌన్ విశ్వవిద్యాలయం నుండి ఆర్థిక శాస్త్రంలో విద్యను అభ్యసించారు. మెకిన్సే అండ్ కంపెనీలో పనిచేసిన అనుభవం ఆమెకు ఉంది. ప్రస్తుతం తండ్రి సంస్థ ట్రినా సోలార్ కంపెనీ బోర్డులో సహ-అధ్యక్షురాలిగా వ్యవహరిస్తున్నారు. 1997లో ప్రారంభమైన ట్రినా సోలార్ మార్కెట్ విలువ ప్రస్తుతం సుమారు $6.3 బిలియన్ డాలర్లుగా ఉంది. వివిధ అంచనాల ప్రకారం గావో హైచున్ వ్యక్తిగత సంపద సుమారు 26 వేల కోట్ల రూపాయలుగా ఉండొచ్చని తెలుస్తోంది.
సోషల్ మీడియాలో ‘చాయ్ వాలా'(chai wala)గా ప్రచారం పొందిన జాంగ్ జున్‌జీ, అమెరికాలో లిస్టింగ్ అయిన ప్రీమియం చాయ్ బ్రాండ్ ‘చాగీ’ యజమాని. ఆయన 2017లో ఈ ప్రీమియం టీ బ్రాండ్‌ను ప్రారంభించారు. 2024 ఏప్రిల్‌లో కంపెనీ న్యూయార్క్ స్టాక్ ఎక్స్చేంజ్‌లో లిస్టింగ్ అయ్యాక ఆయన బిలియనీర్‌గా మారారు. ప్రస్తుతం కంపెనీ సీఈవో , చైర్మన్‌గా ఉన్నారు. చైనీస్ క్లాసిక్ కథ ‘ఫేర్ వెల్ మై కన్ క్యూబిన్’ నుంచి ప్రేరణ పొంది తన కంపెనీకి పేరు పెట్టారు. చాగీ బ్రాండ్‌కు చైనా అంతటా ప్రస్తుతం 7,000కు పైగా స్టోర్లు ఉన్నాయి. వివిధ నివేదికల ప్రకారం, జాంగ్ జున్‌జీ వ్యక్తిగత సంపద సుమారు 17 వేల కోట్ల రూపాయలుగా అంచనా.
మొత్తం మీద ఈ జంట సంయుక్త సంపదతో పాటు వారి వ్యాపార సామ్రాజ్యాల కలయిక చైనా ఆర్థిక ప్రపంచంలో హాట్ టాపిక్‌గా మారింది. ఈ బిలియన్ డాలర్ల ప్రేమకథ పెళ్లితో ఒక కొత్త మలుపు తీసుకోనుంది.
