అద్భుత నిర్మాణాలు.. అత్యాధునిక సౌకర్యాలతో నవ్యాంధ్ర రాజధాని అమరావతి.. ప్రపంచ మేటి నగరాల్లో ఒకటిగా భాసిల్లాలన్నది ముఖ్యమంత్రి చంద్రబాబు ఆకాంక్ష..! అందుకే ఈ కలల రాజధాని అన్ని రంగాల్లోనూ ప్రత్యేకతను చాటుకొనేలా మాస్టర్ప్లాన్ను రూపొందించారు. అమరావతి నగరాన్ని రోడ్డు, వాయు, రైలు మార్గాల ద్వారా నేరుగా అనుసంధానించేలా, వాటిలో ఆధునికత ఉట్టిపడేలా జాగ్రత్తలు తీసుకుంటున్నారు. ప్రపంచ ప్రఖ్యాతిగాంచిన రైల్వేస్టేషన్ను నిర్మించేలా పథకరచన చేశారు. నెక్కల్లు-పెదపరిమి సమీపంలో దేశంలోకెల్లా అతిపెద్ద రైల్వేస్టేషన్ను నిర్మించనున్నారు. దీనికోసం రాష్ట్ర ప్రభుత్వం రైల్వేశాఖకు సుమారు 1500 ఎకరాలు అప్పగించేందుకు సుముఖత వ్యక్తం చేసింది.
ఆంధ్రప్రదేశ్ ప్రభుత్వం అమరావతిలో పనులు చేపట్టేందుకు నిధులతో పాటుగా రోడ్లు, రైల్వే లైన్ సహా అన్ని విధాలుగా కేంద్రం సహకారం తీసుకుంటోంది. ఈ మేరకు అమరావతికి రైల్వే లైన్కు కూడా గ్రీన్ సిగ్నల్ రాగా.. ఖమ్మం జిల్లాలోని ఎర్రుపాలెం నుంచిగుంటూరులోని నంబూరు వరకు 57 కిలోమీటర్ల మేర కొత్త రైలు మార్గం రానుంది. ఈ మేరకు రూ.2,245 కోట్లు ఖర్చు అవుతుంది. ఈ కొత్త రైలు మార్గంతో అమరావతి నగరాన్ని హైదరాబాద్, విజయవాడ, గుంటూరు, చెన్నై నగరాలతో అనుసంధానం చేస్తారు. అయితే అమరావతికి సంబంధించి కొత్త రైల్వే స్టేషన్ను గట్టిగానే ప్లాన్ చేస్తున్నారు. దేశంలోనే అతిపెద్ద రైల్వే స్టేషన్ను అమరావతిలో నిర్మించాలని ముఖ్యమంత్రి చంద్రబాబు భావిస్తున్నారు.
అమరావతి నగరాన్ని అన్ని విధాలా అభివృద్ధి చేయడంతో పాటుగా రోడ్డు, రైలు, విమాన మార్గాల ద్వారా అనుసంధానం చేయాలని చూస్తోంది. అన్ని రంగాల్లోనూ ప్రత్యేకత చాటుకునేలా మాస్టర్ప్లాన్ రూపొందించారు. ముఖ్యంగా రైల్వే స్టేషన్ను ప్రపంచ స్థాయి ప్రమాణాలతో నిర్మించాలనే ఆలోచనలో ఉన్నారు. నెక్కల్లు-పెదపరిమి దగ్గర దేశంలోనే అతిపెద్ద రైల్వే స్టేషన్ను నిర్మించాలని భావిస్తున్నారు. దాదాపు 1500 ఎకరాల భూమిని రాష్ట్ర ప్రభుత్వం రైల్వే శాఖకు ఇవ్వాలని భావిస్తోందట. అమరావతి రైల్వే లైన్ను రెండు దశల్లో పూర్తి చేయాలని రైల్వేశాఖ నిర్ణయించగా.. తొలి దశలో ఖమ్మం జిల్లాలోని ఎర్రుపాలెం నుంచి 27 కిలోమీటర్ల లైన్ను నిర్మిస్తారు. దీనికోసం రెండు నెలల్లో టెండర్లు పిలవనున్నారు. మొదటి దశలోనే దాములూరు-వైకుంఠపురం మధ్య కృష్ణా నదిపై 3.2 కిలోమీటర్ల రైల్వే బ్రిడ్జిని నిర్మిస్తారు.. దీనికోసం రూ.800 కోట్లు ఖర్చు అవుతుందని అంచనా వేశారు.
తాడికొండ మండలంలో కొందరు రైతులు భూమి ఇవ్వడానికి అభ్యంతరం చెప్పడంతో భూసేకరణ ఆలస్యమవుతోంది. అమరావతి రైల్వే స్టేషన్ను అమరావతి నగర శివారులో ఏర్పాటు చేయాలని భావిస్తున్నారట. దేశంలోనే ఒక మోడల్ రైల్వే స్టేషన్గా అత్యాధునిక సౌకర్యాలతో నిర్మించాలని సీఎం చంద్రబాబు ఆలోచన చేస్తున్నారట. దేశంలో ప్రయాగరాజ్, వారణాసి, ముంబైలోని ఛత్రపతి శివాజీ మహారాజ్ టెర్మినస్ రైల్వే స్టేషన్లు చాలా అందంగా ఉన్నాయి. వాటికి దీటుగా అమరావతి రైల్వే స్టేషన్ ఉండబోతుంది అంటున్నారు.
అలాగే అమరావతికి దగ్గరలోనే ఒక పెద్ద గూడ్స్ యార్డును కూడా ఏర్పాటు చేయాలని రైల్వేశాఖ ఆలోచిస్తోందట.
ఈ రైల్వే లైన్లో కొత్తగా ఏర్పడుతున్న ఎన్టీఆర్ జిల్లా పరిటాల స్టేషన్ దగ్గర మల్టీమోడల్ కార్గో టెర్మినల్ను ప్రత్యేకంగా ఏర్పాటు చేస్తారు. ప్రైవేటు సంస్థల సహాయంతో ఈ టెర్మినల్ను అభివృద్ధి చేస్తారని చెబుతున్నారు. దీని ద్వారా చాలా మందికి ఉద్యోగాలు వస్తాయని భావిస్తున్నారు. ఈ లైన్లో కవచ్ టెక్నాలజీని ఏర్పాటు చేస్తారు.. రైళ్లు గంటకు 160 కిలోమీటర్ల వేగంతో వెళ్లేలా అమరావతి రైల్వే లైన్ను ప్లాన్ చేస్తున్నారట. అమరావతి కొత్త రైల్వే లైన్ ఖాజీపేట-విజయవాడ సెక్షన్లో ఉన్న ఎర్రుపాలెం నుంచి గుంటూరు-విజయవాడ సెక్షన్ మధ్య ఉన్న నంబూరు వరకు 57 కిలోమీటర్ల మేర కొత్త బ్రాడ్గేజ్ సింగిల్ రైల్వే లైన్గా నిర్మించాలని రైల్వేశాఖ నిర్ణయించింది.
ఎర్రుపాలెం-నంబూరు మధ్య పెద్దాపురం, చెన్నారావుపాలెం, గొట్టుముక్కల, పరిటాల, కొత్తపేట, వడ్డమాను, అమరావతి, తాడికొండ, కొప్పురావూరు స్టేషన్లను కొత్తగా ఏర్పాటు చేస్తారు. వీటిలో పెద్దాపురం, పరిటాల, కొప్పురావూరు పెద్ద స్టేషన్లుగా, అమరావతి స్టేషన్ అతిపెద్దదిగా ఉంటాయి. ఎన్టీఆర్ జిల్లా దాములూరు, గుంటూరు జిల్లా వైకుంఠపురం మధ్య కృష్ణా నదిపై 3.2 కిలోమీటర్ల పొడవున రైల్వే బ్రిడ్జిని నిర్మిస్తారు. ఈ ప్రాజెక్టును నాలుగేళ్లలో పూర్తి చేయాలని భావిస్తున్నారట.. ఈ రైల్వే లైన్ కోసం ఎర్రుపాలెం నుంచి నంబూరు వరకు మొత్తం 521.22 ఎకరాలను రైల్వేశాఖ సేకరించింది. తెలంగాణలోని ఖమ్మం జిల్లాలో 24.01 ఎకరాలను, గుంటూరు జిల్లాలో 199.71 ఎకరాలు, ఎన్టీఆర్ జిల్లాలో 297.21 ఎకరాలను 2013 భూసేకరణ చట్టం ప్రకారం సేకరించారు.
